Helga Þórisdóttir, forstjóri Persónuverndar og forsetaframbjóðandi, og eiginmaður hennar standa nú í stappi við Reykjavíkurborg vegna bílskýlis sem reist var án leyfis. Lagðar voru á dagsektir en hjónin fengu þeim hnekkt uns niðurstaða fæst í kærumál.
Bílskýlið var reist á lóð hjónanna að heimili þeirra í Grundarlandi í Fossvogi með samþykki meðlóðahafa. Hins vegar skorti leyfi frá borginni.
Byggingafulltrúi sendi hjónunum bréf þann 22. ágúst síðastliðinn þar sem þeim var tilkynnt að borist hefði ábending um að búið væri að reisa óleyfilegt mannvirki á lóðinni, það er téð bílskýli og skúr utan byggingarreits. Var þeim skipað að rífa skýlið niður innan 90 daga annars yrðu lagðar á dagsektir.
Eiginmaður Helgu, Theodór Jóhannsson, óskaði eftir afstöðu skipulagsfulltrúa Reykjavíkurborgar til bílskýlisins þann 30. september.
Skipulagsfulltrúi tók hins vegar neikvætt í erindið og sagði það ekki samræmast gildandi skipulagi. Í gildandi skipulagi komi fram að bifreiðageymsla sé í húsinu sjálfu eða áföst við það og að minnsta kosti eitt bílastæði á hverjum lóðarhluta. Heimild til byggingar bifreiðageymslu hafi því verið fullnýtt.
Þann 28. nóvember fengu Helga og Theodór tilkynningu um það að ákvörðun byggingafulltrúa stæði en hún væri kæranleg til Úrskurðarnefndar umhverfis- og auðlindamála sem þau og gerðu.
Byggingafulltrúi sendi þeim svo bréf 23. janúar um að lagðar yrðu á dagsektir, það er 25 þúsund krónur á hvern dag sem dragist að verða við kröfu borgarinnar um niðurrif bílskýlisins.
Óskuðu þau eftir því við byggingafulltrúa þann 20. febrúar að dagsektirnar yrðu stöðvaðar á meðan kæra þeirra væri til meðferðar hjá úrskurðarnefndinni en byggingafulltrúi synjaði því. Var sú ákvörðun þá kærð til sömu nefndar.
Á mánudag, 24. febrúar, úrskurðaði nefndin hjónunum í hag og frestaði dagsektunum. Í úrskurðinum segir að almenna reglan sé að kærur fresti ekki réttaráhrifum stjórnvaldsákvarðana.
„Það mæli hins vegar með því að fresta réttaráhrifum ákvörðunar ef aðili máls sé aðeins einn og ákvörðun er íþyngjandi fyrir hann, veldur honum t.d. tjóni. Þetta sjónarmið vegi sérstaklega þungt í þeim tilvikum þar sem erfitt yrði að ráða bót á tjóninu enda þótt ákvörðunin yrði síðar felld úr gildi af hinu æðra stjórnvaldi,“ segir í úrskurðinum. „Eins og málsatvikum er háttað þykir rétt að fresta réttaráhrifum ákvörðunarinnar enda liggja ekki fyrir knýjandi ástæður sem gera það að verkum að varhugavert sé að bíða niðurstöðu úrskurðarnefndarinnar um ágreiningsefni máls þessa.“
Helga svaraði stuttlega fyrirspurn DV vegna málsins. Svar hennar er eftirfarandi:
„Bílskýlið var reist í góðri trú. Málið er til meðferðar hjá úrskurðarnefnd umhverfis- og auðlindamála.“
