Samkvæmt heimildum DV höfðu menn sem grunaðir eru um að hafa orðið 65 ára gömlum manni frá Þorlákshöfn að bana samband við náinn aðstandanda hans og kröfðu þá manneskju um að millifæra þrjár milljónir króna.
Höfðu þá staðið yfir barsmíðar á manninum sem héldu áfram. Aðstandandinn neitaði að millifæra féð. Engu að síður tókst árásarmönnunum að komast yfir þessa fjármuni fyrir tilverknað mannsins og hættu þá barsmíðum sínum. Maðurinn lést engu að síður af völdum misþyrminganna, en eins og komið hefur fram fannst hann þungt haldinn á göngustíg í Gufunesi og lést skömmu síðar á sjúkrahúsi.
Þetta herma áreiðanlegar heimildir DV. Er ljóst að árásarmennirnir komust yfir umtalsvert fé frá manninum áður en hann lést.
Lögregla krafðist í dag fjögurra vikna gæsluvarðhalds yfir þremur af þeim mönnum sem voru handteknir fyrst vegna rannsóknar málsins. DV hefur fengið staðfest að einn þeirra hafi verið úrskurðaður í gæsluvarðhald en fastlega má búast við það þeir Héraðsdómur Suðurlands fallist á áframhaldandi gæsluvarðhald yfir þeim öllum.
Alls hafa 11 manns verið handtekin vegna rannsóknar málsins, þar af tvær konur. Sjö sitja núna í gæsluvarðhaldið. Rannsókn er sögð ganga vel en lögregla þarf að vinna úr miklu magni af gögnum, meðal annars farsímagögnum, sönnunargögnum úr bílum sem hafa verið haldlagðir, skýrslutökum og húsleitum.
Uppfært kl. 18:50: Héraðsdómur Suðurlands hefur fallist á kröfu lögreglunnar um áframhaldandi gæsluvarðhald yfir þremur sakborningum í málinu.
