Drengur undir lögaldri hefur verið sakfelldur í Héraðsdómi Reykjavíkur fyrir líkamsárás sem framin var annars vegar í biðstöð Strætó og hins vegar á einum af útsölustöðum pítsustaðakeðjunnar Domino´s í Reykjavík.
Drengurinn var ákærður fyrir að hafa framið líkamsárásina 6. mars 2023. Samkvæmt ákærunni réðst hann á einstakling, sem miðað við samhengi dómsins var einnig drengur á unglingsaldri, í félagi við þekktan aðila. Fyrst var ráðist á þolandann innandyra í biðstöð Strætó og sparkað ítrekað í höfuð hans og líkama, kýlt og hrækt á hann og skömmu síðar var aftur veist að honum í þetta sinn á Domino´s og hann kýldur í andlitið. Afleiðingar árásarinnar voru þær að þolandinn hlaut mar og bólgu á efri vör, kúlu hægra megin á hnakka, eymsli ofan gagnauga vinstra megin, á enni og í mjóbaki og mar vinstra megin á enni.
Fyrir hönd barnaverndarþjónustu Kópavogs var þess krafist að þolandanum yrðu dæmdar 1 milljón króna í miskabætur auk vaxta og dráttarvaxta.
Drengurinn játaði brot sitt skýlaust en sagði bótakröfuna of háa.
Í dómnum er tekið fram að hann sé enn ólögráða en hversu gamall hann var þegar hann réðst á þolandann, fyrir tveimur árum, hefur verið afmáð úr dómnum.
Segir í dómnum að við ákvörðun refsingar sé litið til ungs aldurs drengsins sem og játningar hans. Á móti sé hins vegar horft til þess að hann hafi ráðist á þolandann tvisvar með stuttu millibili og að árásin hafi meðal annars beinst að höfði þolandans. Í ljósi alls þessa þótti hæfilegt að dæma drenginn í 30 daga skilorðsbundið fangelsi.
Haldi drengurinn skilorð í tvö ár fellur refsingin niður. Hann er einnig dæmdur til að sæta umsjón og fyrirmælum barnaverndaryfirvalda fram til 18 ára aldurs en eftir það Fangelsismálastofnunar. Þegar kemur að upphæð skaðabóta þarf drengurinn að greiða þolanda sínum 200.000 krónur auk vaxta og dráttarvaxta og þar að auki 267.840 krónur í málskostnað vegna bótakröfunnar.
