Lögreglan á Suðurlandi hefur sent frá sér tilkynningu sem varðar andlát karlmanns snemma í morgun. Lögregluaðgerðir hafa staðið yfir í Þorlákshöfn í dag vegna rannsóknar málsins en lögregla hefur varist fregna um þær. Í tilkynningu lögreglu segir að áverkar hafi fundist á manninum sem benda til þess að andlátið hafi borið að með saknæmum hætti:

„Lögreglan á Suðurlandi hefur til rannsóknar andlát karlmanns sem lést snemma í morgun. Áverkar á hinum látna benda til að andlátið hafi borið að með saknæmum hætti.

Rannsókn málsins er á frumstigum og er málið rannsakað sem manndráp. Fimm aðilar eru í haldi lögreglu í tengslum við rannsóknina.

Lögreglan á Suðurlandi fer með rannsókn málsins og hefur notið aðstoðar lögreglunnar á Höfuðborgarsvæðinu, Suðurnesjum og Vesturlandi auk embættis héraðssaksóknara og sérsveitar ríkislögreglustjóra.

Vegna rannsóknarhagsmuna er að svo stöddu ekki unnt að veita nánari upplýsingar um málið.“

DV ræddi stuttlega við Jón Gunnar Þórhallsson, yfirlögregluþjón hjá Lögreglunni á Suðurlandi, og sagði hann lögreglu ekki geta veitt frekari upplýsingar um málið umfram það sem kemur fram í tilkynningunni. Aðspurður svaraði hann því ekki hvort hinn látni væri frá Þorlákshöfn en þar hafa lögregluaðgerðir staðið yfir í dag vegna málsins. Jón Gunnar segir hins vegar að vænta megi frekari upplýsinga um málið á morgun.

Fréttin hefur verið uppfærð.