Undanfarið hefur DV fengið ábendingar frá aðilum sem lýst hafa yfir óánægju með ráðningu á verktaka í stöðu ráðgjafa við breytingar á sorphirðukerfi Akureyrarbæjar. Maðurinn sem ráðinn var í verkefnið er sambýlismaður og barnsfaðir konu sem gegnir stöðu forstöðumanns umhverfis- og sorpmála hjá bænum. Viðmælendur hafa gagnrýnt þessi tengsl og varpað fram efasemdum um hæfni og sérþekkingu mannsins.

DV spurðist fyrir um samstarf bæjarins við þennan tiltekna verktaka og spurði hvort verkefnið hefði ekki verið boðið út. Guðríður Erla Friðriksdóttir er sviðsstjóri Umhverfis- og mannvirkjasviðs Akureyrarbæjar og svaraði hún fyrirspurninni. Kemur fram í svari hennar að það var hún sjálf sem réð manninn til verkefnisins en ekki sambýliskona hans, sem er undirmaður Guðríðar á sviðinu.

Verkefnið var unnið í tímavinnu frá nóvember 2022 fram í janúar 2024 og fékk ráðgjafinn greiddar samtals tæplega 12,5 milljónir króna fyrir vinnu sína. Bendir Guðríður á að það sé undir viðmiði varðandi útboðsskyldu. Hún bendir einnig á að ráðgjafinn hafi lokið MBA-námi frá Háskóla Íslands.

Í viðtali við RÚV segir Guðríður að það hafi verið mistök að huga ekki betur að hagsmunatengslum þegar ráðið var í þetta verkefni og hugsanlega hefði átt að ráða annan hæfan aðila í verkefnið. Ítrekar hún hins vegar að sambýliskonan og barnsmóðirin hafi ekki komið að ráðningu mannsins. Hún bendir hins vegar á að maðurinn hafi getað hafið störf strax, sem var brýnt, og hann hafi þekkingu á fjármálastjórnun og markaðsmálum. Einnig hafi hann reynslu af ráðgjafastörfum, meðal annars fyrir sveitarfélög í úrgangsmálum.