Í október síðastliðnum sýndi bandaríski fréttaskýringarþátturinn 60 Minutes viðtal við þáverandi varaforseta og forsetaframbjóðenda Demókrata, Kamala Harris. Donald Trump var ósáttur við viðtalið og sagði það hafa verið klippt til að láta Harris líta sem best út. Lögsótti hann í kjölfarið sjónvarpsstöðina CBS sem sýnir þáttinn og krafðist miskabóta og að óklippt útgáfa af viðtalinu yrði afhent. Stöðin hefur nú orðið við þessum kröfum en gagnrýnendur segja það ógna fjölmiðlafrelsi í Bandaríkjunum.
Lögmenn móðurfyrirtækis CBS, Paramount, hafa unnið að því að semja um málið við lögmenn Trump.
Stöðin segist nauðbeygð til að afhenda viðtalið óklippt. Brendan Carr sem Trump skipaði, þegar hann tók við sem forseti, sem yfirmann FCC, ríkisstofnunar sem sér meðal annars um eftirlit með starfsemi fjölmiðla, hafi beinlínis fyrirskipað það.
Framleiðendur 60 minutes hafa hingað til neitað því að afhenda óklipptar útgáfur viðtala sem birt eru í þættinum. Fréttamenn sem starfa hjá CBS og á öðrum fjölmiðlum sem og aðrir sem berjast fyrir fjölmiðlafrelsi eru sagðir fylgjast vel með málinu og telja það ógn við fjölmiðlafrelsi.
Ásakanir um að viðtalið við Harris hefði verið klippt á óeðlilegan hátt má að sögn rekja til þess að í umræðuþættinum Face the Nation sem sýndur var daginn áður en viðtalið var sýnt í 60 minutes voru birt brot úr viðtalinu þar sem sjá mátti önnur svör við sömu spurningum og í síðarnefnda þættinum. CBS svaraði þessu þannig að svör Harris við spurningum hefðu verið stytt í klippingu í þeim tilgangi að fara ekki fram úr þeim tíma sem ætlaður var í útsendingu þáttanna en um leið sýna svörin í heild sinni, en báðir þættir eru sendir út í línulegri dagskrá.
Lögsókn Trump var lögð fram viku eftir að viðtalið var sýnt en hann hélt henni til streitu þrátt fyrir að hafa unnið kosningarnar. Sagði hann viðtalið hafa verið hugsað til að hafa óeðlileg áhrif á kosningarnar.
Sjálfur hafnaði Trump því að fara í viðtal við 60 Minutes. Hann hefur áður lögsótt fjölmiðlafyrirtæki en hann hefur löngum eldað grátt silfur við fjölmiðla og segir iðulega fréttir sem sýna hann ekki í jákvæðu ljósi vera lygar.
