Þann 13. desember ár hvert er bæði í kaþólskum löndum og lúterskum haldið upp á messu heilagrar Lúsíu. Á fjórðu öld færði Lúsía kristnum mönnum sem voru í felum frá Rómverjum mat. Segir sagan að hún hafi verið klædd í kyrtil og með blómakrans á höfðinu alsettan kertum. Lúsíu er minnst á þessum degi víða um hinn kristna heim en á Norðurlöndum er dagurinn einna fyrirferðarmestur í Svíþjóð. Þar í landi markar þessi dagur upphaf jólahátíðarinnar og í flestum skólum er yfirleitt ein eða fleiri stúlkur valdar til að vera Lúsía. Stúlkan eða stúlkurnar eru síðan klæddar eins og hún og síðan ganga fleiri börn í kyrtlum með ljós á eftir þeim í skrúðgöngu á meðan þau og aðrir viðstaddir syngja sænska texta við lagið Sancta Lucia sem er lag sem samið var í Napólí á 19. öld til heiðurs Lúsíu.
Algengara er orðið á síðari árum að strákar fái að vera Lúsía en ljóst er að þessi hefð á sér langa sögu og djúpar rætur í sænsku þjóðlífi en nú hafa stjórnendur leikskóla í Malmö lýst því yfir að börnunum finnist þetta tilstand og sjónarspil, að foreldrum þeirra viðstöddum, orðið óþægilegt, það ýti undir vanlíðan og það sé brot á réttindum þeirra. Til að draga úr vanlíðaninni verði því að banna foreldrum að vera viðstödd.
Í þessu myndbandi má sjá einfalda útskýringu á hefðunum í kringum Lúsíu-daginn í Svíþjóð.
Aftonbladet fjallar um þetta mál en í leikskólanum hefur foreldrum verið bannað að vera viðstaddir Lúsíu-gönguna í ár. Stjórnendur segja börnunum líða illa yfir tilstandinu og finnast það óþægilegt að taka þátt og samkvæmt Barnasáttmála Sameinuðu þjóðanna sé það brot á réttindum þeirra.
Mæður tveggja nemenda á leikskólanum segja bannið fáránlegt. Það verði að kenna svona litlum börnum á lífið en ekki taka alltaf á þeim með silkihönskum. Bannið gilti líka á síðasta ári en foreldrunum hefur verið boðið að sjá upptöku af göngunni. Önnur móðirin segir að í ár sé það hins vegar nýbreytni hjá skólanum að vísa til barnasáttmálans sem hefur verið lögfestur í Svíþjóð. Hún bendir á að ef vísa eigi til hans eigi bann við að foreldrar séu viðstaddir Lúsíu-göngur að gilda um allt land en ekki í einum leikskóla.
Bannið í Malmö er þó ekki einsdæmi. Í sveitarfélaginu Danderyd sem er skammt norður af Stokkhólmi hefur einnig slíku banni við að foreldrar séu viðstaddir Lúsíu-gönguna verið komið á. Í Danderyd eru meðaltekjur á íbúa þær hæstu í Svíþjóð. Byggir bannið á því að foreldrar hafi ekki virt bann við myndatökum á fyrri Lúsíu-göngum.
Hinar óánægðu mæður í Malmö segjast ekki vilja taka myndir heldur vera viðstaddar þessa stund í lífi barnanna. Þær benda á þetta sé opinber skóli sem geti þess vegna ekki verið með svona sérstakar reglur sem gildi ekki í öðrum opinberum skólum. Leikskólastjórinn segir hins vegar að börnunum finnist óþægilegt að vera í rauninni að halda sýningu fyrir fullt af ókunnugu fullorðnu fólki en plássið í skólanum sé takmarkað og þrengslin því nokkur sem auki enn á óþægindin fyrir börnin, vegna nálægðarinnar við fullorðnu gestina. Hlutverk skólans sé að skapa öruggt umhverfi og taka tillit til þarfa barnanna.
Menntamálayfirvöld í Malmö segja skólastjórann ráða þessu og þegar vísað sé til barnasáttmálans sýni það mikilvægi þess að skólastjórinn hafi gert faglegt og vandað mat á því sem sé börnunum fyrir bestu.
