Nokkurs konar „busavígsla“ inn í slökkvilið í Flórída gekk allt of langt. Fjórir voru handteknir og ákærðir fyrir mannrán og líkamsárás eftir að 19 ára nýliði var hýddur með belti og pyndaður með vatni.

„Það sem gerðist var óásættanlegt, óafsakanlegt og gekk gegn öllum gildum slökkviliðsdeildarinnar okkar,“ sagði James Banta, slökkviliðsstjóri í Marion sýslu í Flórdía á blaðamannafundi eftir handtökurnar.

Fjórir slökkviliðsmenn og sjúkraflutningamenn voru handteknir eftir ofbeldisfulla „busavígslu“ 19 ára nýliða í slökkviliðinu. Allir eru þeir á þrítugsaldri, það er Edward Kenny III 22 ára, Seth Day 22 ára, Tate Trauthwein 19 ára og Kaylee Bradley 25 ára.

Hinir þrír fyrstnefndu eru ákærðir fyrir mannrán, líkamsárás og rán samkvæmt yfirlýsingu lögregluembættisins í Marion sýslu þann 26. nóvember síðastliðinn. Bradley er ákærður fyrir rán og aðkomu að ráni.

Hýddu á berann rassinn

Á blaðamannafundi lýsti Billy Woods, lögreglustjóri, lýsti atburðarásinni á blaðamannafundinum. Vígslan, sem átti sér stað þann 16. nóvember á stöð númer 21 í bænum Ocala, byrjaði á því að mennirnir smurðu feiti í andlit nýliðans.

Vildu fjórmenningarnir komast í símann hans til þess að ná í TikTok myndband sem nýliðinn var með. Flúði hann út á bílastæði en þar náðu þeir honum og klæddu úr buxunum.

Þá notuðu þeir belti til þess að hýða hann á rassinn. Loks girtu þeir nærbuxurnar niður um hann og hýddu á berar rasskinnarnar. En nýliðinn vildi ekki láta þá hafa lykilorðið til að komast inn í farsímann.

Vatnspynding eins og í Abu Ghraib

Eftir þetta drógu þeir hinn hálfnakta nýliða út af bílastæðinu og á annan ótilgreindan stað. Þar settu þeir handklæði yfir andlit hans og helltu vatni. Það er beittu vatnspyndingu eins og algengt var í bandarískum herfangelsum í Íraksstríðinu svo sem Abu Ghraib.

Tekið var fram að nýliðinn hafi streist á móti og reynt að komast í burtu undan fjórmenningunum. Þeir hættu hins vegar ekki pyndingunum fyrr en það kom neyðarkall á stöðina og þeir þurftu að fara í björgunarleiðangur.

Reknir og handteknir

Þegar yfirmenn slökkviliðsins komust að því hvað hafði gerst þá hófu þeir samstundis rannsókn á málinu. Greindi áðurnefndur Banta frá því að allir fjórir gerendur í málinu hefðu verið leystir frá störfum og síðar handteknir.

Þrír þeirra hafa verið leystir úr gæsluvarðhaldi eftir að hafa greitt tryggingu. Óvíst er hvort mennirnir hafi játað glæp sinn eða ekki.