Nokkuð var um að vera hjá lögreglunni á höfuðborgarsvæðinu í gærkvöldi og nótt eins og endranær um helgar.

Aðila í annarlegu ástandi vísað út af veitingastað í hverfi 101.

Í þessu sama hluta Reykjavíkur var óskað eftir aðstoð lögreglu vegna manns sem neitaði að yfirgefa hótel, maðurinn fluttur á lögreglustöð þar sem rætt var við hann og honum gerð grein fyrir því að hann væri ekki velkominn þarna. Hann lofaði að finna sér aðra gistingu og í framhaldinu gekk hann sína leið.

Annar aðili sem var í annarlegu ástandi sökum ölvunar var handtekinn og vistaður í fangaklefa en hann hafði verið  til vandræða á hóteli í hverfi 101.

Aðili var síðan handtekinn í hverfi 101 vegna líkamsárásar og vistaður í fangaklefa.

Óskað eftir var eftir aðstoð lögreglu á bar í hverfi 108 þar sem aðilar voru til vandræða, fólkinu var vísað á brott.

Aðili var handtekinn og vistaður í fangaklefa eftir að hafa hent múrstein í gegnum framrúðu á bifreið í hverfi 105.

Í Garðabæ var óskað eftir aðstoð í strætó þar sem farþegi var ölvaður og komst ekki heim til sín hjálparlaust, honum var ekið til síns heima.

Aðili var handtekinn í miðbæ Kópavogs og vistaður í fangaklefa vegna líkamsárásar.

Óskað var eftir aðstoð í verslun í Breiðholti vegna þjófnaðar, málið var afgreitt með vettvangsskýrslu.

Loks var bifreið ekið á ljósastaur í Grafarholti og Úlfarsárdal, ökumaðurinn var fluttur með sjúkrabifreið á slysadeild til aðhlynningar.