Bæjarráð Reykjanesbæjar hefur mótmælt fyrirhuguðum breytingum á leið 55 í landsbyggðarstrætó, þar sem ekið er milli bæjarins og höfuðborgarsvæðisins. Segir bæjarráð þessar breytingar fela í sér skerðingu á þessari þjónustu. Er bent á að það skjóti skökku við að Vegagerðin sem sér um skipulagningu landsbyggðarstrætó geri slíkar breytingar á sama tíma og ríkið leggi meira til almenningssamgangna á höfuðborgarsvæðinu þar sem bætt hafi verið í þjónustuna. Ljóst er einnig að gerðar verða sams konar breytingar á fleiri leiðum landsbyggðarstrætó sem hafa verið gagnrýndar víðar en í Reykjanesbæ og unnið er að aukinni aðkomu ríkisins að almenningssamgöngum innan höfuðborgarsvæðisins. Hins vegar ber ekki á útskýringum á því hvers vegna annað eigi að gilda um landsbyggðina þar sem vísað er til þess að ríkið eigi bara að koma að samgöngum milli sveitarfélaga en ekki innan þeirra.
Biðstöðvum á leið 55, sem er sú leið landsbyggðarstrætó sem mest er notuð, í Reykjanesbæ verður fækkað úr átta í tvær eftir áramótin. Gagnrýnt hefur verið sérstaklega að engin biðstöð verði á Ásbrú, þaðan sem einna flestir farþegar koma, og um 500 manns hafa ritað undir undirskriftalista þar sem því er mótmælt, sem er ígildi um 10 prósent íbúa á Ásbrú. Til að komast á næstu biðstöð þyrftu íbúar á Ásbrú að fara nokkra kílómetra leið en fyrsti vagn á morgnanna til höfuðborgarsvæðisins fer af stað á undan fyrsta vagni í innanbæjarstrætó í Reykjanesbæ. Er bent á að afleiðingarnar verði þær að fólk sem býr á Ásbrú og þarf að komast fyrir klukkan 8 í vinnu eða skóla á höfuðborgarsvæðinu muni trauðla geta nýtt sér leið 55 lengur.
Einnig verður ferðum þar sem ekið er beint á milli Reykjanesbæjar og Reykjavíkur fækkað og fleiri ferðir munu því enda eða byrja í Hafnarfirði.
Sams konar breytingar verða gerðar á fleiri leiðum landsbyggðarstrætó. Á Suðurlandi verður til að mynda biðstöðvum á leiðinni milli Selfoss og Reykjavíkur fækkað og einnig á leiðum milli þéttbýliskjarna í landshlutanum. Ekki verður lengur hægt að taka Strætó beint frá Reykjavík í Landeyjahöfn fyrir þá sem vilja komast til Vestmannaeyja án þess að vera á einkabíl, en taka þarf tvo vagna til að komast þessa leið.
Biðstöðvum á leiðinni milli Akraness og Reykjavíkur verður einnig fækkað og tíðni ferða milli Reykjavíkur og Akureyrar minnkar.
Leið 55 er einnig ekki sú eina sem breytist á Suðurnesjum en ferðum milli Suðurnesjabæjar og Reykjanesbæjar verður fækkað.
Á sumum stöðum, til að mynda á milli sumra þéttbýliskjarna á Suðurlandi, er tíðni ferða hins vegar aukin.
Sveitarstjórnir á landsbyggðinni hafa gagnrýnt þessar breytingar til að mynda hafa sveitarfélög á Norðurlandi gagnrýnt fækkun ferða milli Reykjavíkur og Akureyrar.
Einna mest hefur þó borið þó á gagnrýni frá Reykjanesbæ á breytingarnar á leið 55 sem bæjaryfirvöld segja að feli augljóslega í sér þjónustuskerðingu. Bæjarráð segir fyrirséð að það muni kosta bæinn 15 milljónir króna að bæta við þjónustu innanbæjarstrætó svo til að mynda íbúar eigi möguleika á að nýta sér fyrstu ferð leiðar 55 á morgnana, eftir fækkun biðstöðva. Bæjarráð bendir einnig á að Reykjanesbær, sem er fjórða fjölmennasta sveitarfélag landsins og það fjölmennasta utan höfuðborgarsvæðisins, sé undir meðaltali tekna stærstu sveitarfélaganna.
Vegagerðin hefur svarað gagnrýni á þessar breytingar sem kallaðar hafa verið þjónustuskerðing með því að samkvæmt stefnu stjórnvalda sé það hennar hlutverk að hafa yfirumsjón með almenningssamgöngum á milli sveitarfélaga landsins en sveitarfélögin sjái sjálf um aksturinn innanbæjar.
Bæjarráð Reykjanesbæjar bendir á að þetta skjóti skökku við þegar framlög ríksins til almenningssamgangna hafi hækkað um 2,3 milljarða króna milli 2024 og 2025 en helstu breytingarnar hafi snúið að aukinni þjónustu í öllum sveitarfélögum höfuðborgarsvæðisins með styttri ferðatíma og lengri þjónustutíma. Áherslur á landsbyggðina og samfélögin þar mæti hins vegar afgangi.
Þótt landsbyggðarstrætó sé hluti af leiðakerfi Strætó b.s. þá sjá önnur félög, á grundvelli útboða, um aksturinn utan höfuðborgarsvæðisins en farþegar sem koma frá landsbyggðinni geta skipt yfir í vagna Strætó þurfi þeir að komast lengra en á endastöð landsbyggðarstrætó.
Fyrr á þessu ári var tilkynnt um að ferðatíðni ýmissa leiða Strætó b.s. á höfuðborgarsvæðinu yrði aukin. Í tíð síðustu ríkisstjórnar var ákveðið að nýtt félag í eigu ríkisins og sveitarfélaganna á höfuðborgarsvæðinu myndi taka við rekstri almenningssamgangna á höfuðborgarsvæðinu af Strætó b.s. Unnið hefur verið að stofnun félagsins og því er ljóst að ríkið mun koma með beinum hætti að rekstri almenningssamgangna sem snúa að akstri innan sveitarfélaga á höfuðborgarsvæðinu. Hins vegar hefur ekki orðið vart við neinar útskýringar á því hvers vegna ríkið muni aðeins annast almenningssamgöngur á milli sveitarfélaga á landsbyggðinni en eigi ekki á nokkurn hátt að koma að almenningssamgöngum innan þeirra eins og hlutverk Vegagerðarinnar er sagt vera.
Lítið sem ekkert hefur heyrst frá Eyjólfi Ármannssyni innviðaráðherra vegna þessara breytinga á almenningssamgöngum á landsbyggðinni og skýringar hans á þessum mun sem gerður hefur verið á milli höfuðborgarsvæðisins og landsbyggðarinnar liggja því ekki fyrir. Þingmenn landsbyggðarkjördæmanna, til að mynda Suðurkjördæmis sem Reykjanesbær tilheyrir, hafa heldur ekki hreyft miklum andmælum eða athugasemdum við þessu.
Í stefnuyfirlýsingu ríkisstjórnarinnar er ekkert minnst á almenningssamgöngur á landsbyggðinni heldur aðeins að þær skuli efldar á höfuðborgarsvæðinu. Það virðast því vera litlar líkur á að stjórnvöld muni að einhverju leyti koma til móts við áðurnefnd andmæli bæjaryfirvalda og íbúa í Reykjanesbæ sem telja það blasa við að þjónusta sem skert verði á landsbyggðinni um áramótin verði hins vegar efld á höfuðborgarsvæðinu.
