Í Morgunblaðinu í dag er þess minnst að 40 ár eru liðin frá lyktum máls hins svokallaða Malaga-fanga, sem var áberandi í fjölmiðlum veturinnn 1984-1985.

Stefán Almarsson þurfti að dúsa í 9 mánuði í einu alræmdasta fangelsi Spánar, Centro Penitenciaric de Preventivos, í Malaga á Suður-Spáni, eftir að hann hafði miðað leikfangabyssu á lögreglumann sem bað hann um að framvísa vegabréfi.

Stefán var smáglæpamaður, eins og hann lýsti sjálfum sér, en hann var ákærður fyrir innbrot í Torremolinos þar sem samskonar leikfangabyssa og hann miðaði á lögreglumanninn hafði horfið.

Nafnið Malaga-fanginn festist við Stefán og naut hann samúðar almennings hér á landi sem gramdist það að Íslendingur þyrfti að búa við illan aðbúnað í spænsku fangelsi, en fyrir atbeina íslenskra stjórnvalda var hann loksins látinn laus vorið 1985, eftir 9 mánaða vist í fangelsinu.

Sigmundur Ernir Rúnarsson þingmaður var á þessum tíma blaðamaður á Helgarpóstinum og tók hann viðtal við Stefán haustið 1985, en Stefán lá þá á sjúkrahúsi eftir að hafa verið stunginn á Hverfisgötu.

Sigmundur rifjar upp í viðtali við Morgunblaðið: „Meginástæðan fyrir þessu viðtali var þessi séríslenska umhyggja. Íslendingum þótti svo sárt að sjá þennan smákrimma sinn og fulltrúa undirheimanna mánuðum saman í rammgerðu fangelsi á Spáni, sem var að hans sögn langan veg frá því að vera sambærilegt við Litla-Hraun, og það var lenska mánuðum saman að koma þessum manni út og hann kom til landsins nánast sem þjóðhetja,“

Gekk illa að losna við manninn

Viðtalið dró þann dilk á eftir sér að Malaga-fanginn var lengur í samskiptum við Sigmund en sá síðarnefndi kærði sig um og þau samskipti voru ekki alltaf þægileg. „Mér leið illa í nokkur misseri vegna þessa,“ segir Sigmundur. Vildi Stefán að Sigmundur greiddi götu hans í kerfinu en hann taldi ógæfu sína vera öðrum að kenna en honum sjálfum. Þegar Stefán var farinn að hóta Sigmundi og fjölskyldu hans lokaði Sigmundur alveg á hann.

„Ég var svona að reyna að hrista hann af mér og mér leist ekki á blikuna þegar komið var fram á nýjan áratug og þá sagði hann eitt sinn að hann vissi á hvaða leikskóla börnin mín væru,“ segir Sigmundur.

Sjá nánar í Morgunblaðinu.