Vísir greindi frá því í gær að Inga, sem er félags- og húsnæðismálaráðherra, muni hafa hellt sér yfir skólastjóra Borgarholtsskóla vegna týnds Nike-skópars barnabarns hennar. Er Inga sögð hafa minnt á vald sitt og áhrif í samfélaginu og tengsl við lögreglu.
Skórnir komu í leitirnar um síðir en Inga mun hafa verið ósátt við hversu illa gekk að finna þá. Símtalið átti sér stað að sögn fyrir um þremur vikum.
Morgunblaðið ræðir í dag til dæmis við Guðrúnu Hafsteinsdóttur, fyrrverandi dómsmálaráðherra og þingmann Sjálfstæðisflokksins um málið. „Mér finnst þessi frétt vera með ólíkindum, ef hún er sönn,“ segir hún og bætir við:
„Ef Inga er orðin ráðherra á þessum tíma þá er þetta mikil misbeiting á ráðherravaldi, sem ég myndi segja að væri mjög alvarlegt.“
Undir þetta tekur Sigríður Á. Andersen, fyrrverandi dómsmálaráðherra og þingmaður Miðflokksins. Hún segir að ekki þurfi neinar sérstakar siðareglur til að sjá að ráðherra eigi ekki að notfæra sér stöðu sína í eiginhagsmunaskyni.
