Símon Ingvar Jósefsson var fyrr í dag sakfelldur í Héraðsdómi Reykjavíkur fyrir að grípa utan um lim ólögráða drengs og segja honum að hann væri ekki með standpínu. Símon játaði brot sitt en mikil dráttur á meðferð málsins átti sinn þátt í því að hann hlaut skilorðbundinn fangelsisdóm.
Í dómnum kemur fram að atvikið hafi átt sér stað í sturtuklefa sundlaugar sumarið 2022. Það er ekki tilgreint um hvaða sundlaug var að ræða en eins og DV hefur greint frá var það í Grafarvogslaug. Var Símon ákærður fyrir kynferðislega áreitni en ákæran var lögð fram í desember 2024.
Aldur drengsins er ekki tilgreindur í dómnum en fram kemur að hann var ólögráða þegar atvikið átti sér stað.
Símon játaði brot sitt en verjandi hans krafðist þess að honum yrði ekki gerð refsing.
Fram kemur í dómnum að Símon hafi fjórum sinnum gengist undir lögreglustjórasátt vegna umferðarlagabrota, síðast í september 2022. Fjórða brotið var metið honum til refsiauka í þessu máli sem og ungur aldur drengsins og alvarleiki brotsins. Á móti var horft til játningar Símonar og hversu langan tíma meðferð málsins tók sem ekki væri hægt að kenna honum um. Eins og áður segir átti brotið sér stað fyrir tveimur og hálfu ári en ákæra var gefin út í síðasta mánuði.
Því þótti hæfilegt að dæma Símon í þriggja mánaða skilorðsbundið fangelsi. Hann var þar að auki dæmdur til að greiða drengnum 500.000 krónur í miskabætur auk vaxta en móðir drengsins hafði krafist 1.200.000 króna fyrir hans hönd.
Dóminn í heild sinni er hægt að nálgast hér.
