241 af þeim 242 sem voru um borð í vélinni létust, auk nokkurra á jörðu niðri, en gríðarlegt eldhaf braust út eftir slysið, enda vélin stútfull af eldsneyti.
Ekki löngu eftir að fregnir af slysinu spurðust út birtist myndband af Viswash eftir slysið en það þykir ganga kraftaverki næst að hann hafi lifað slysið af og sloppið án alvarlegra meiðsla.
Mail Online segir í dag frá því að Viswash hafi setið í sæti 11A, í gluggasæti alveg við inngang vélarinnar. Viswash er breskur ríkisborgari og var hann á Indlandi í viðskiptaerindum ásamt yngri bróður sínum, Ajaykumar Ramesh, sem einnig var um borð í vélinni.
Ajakumar sat í sæti 11 J, sömu sætaröð en við gluggann hinum meginn, og er hann sagður hafa horfið í eldhafið þegar vélin brotlenti.
Í umfjöllun Mail Online segir að aðstandendur bræðranna hafi komið saman á heimili fjölskyldunnar í Leicester á Englandi í gær. „Það er kraftaverk að annar þeirra hafi lifað af,“ segir Nayankumar Ramesh.
„Maður sér það á myndum af honum sem teknar voru á sjúkrahúsinu af indversku pressunni að hann er slasaður. Við ætlum að fljúga til hans á morgun,“ sagði Nayankumar í gærkvöldi.
Indversk yfirvöld staðfestu í morgun að alls hefðu átta látist á jörðu niðri þegar vélin brotlendi. Fjórir þeirra voru læknanemar sem bjuggu í einni þeirra bygginga sem eyðilögðust þegar vélin brotlenti á þeim. Leit að svarta kassanum svokallaða stendur yfir en hann mun geta varpað frekara ljósi á hvað olli slysinu.
