Þetta stendur orðrétt í 23. lið stefnuyfirlýsingar ríkisstjórnar Samfylkingar, Viðreisnar og Flokks fólksins frá 21. desember síðastliðnum.
Vilhjálmi Birgissyni, formanni Starfsgreinasambandsins, er farið að lengja eftir því að þetta loforð um óháða úttekt á krónunni verði uppfyllt.
„Þetta var mikilvægt loforð – en hvar er sú skýrsla nú? Það var sérstaklega lagt upp með að þessi úttekt ætti að hefjast strax í upphafi kjörtímabilsins, en enn hefur ekkert heyrst um stöðu málsins,“ segir Vilhjálmur í pistli á Facebook-síðu sinni.
Hann segir það gríðarlega mikilvægt að þessi úttekt fari fram af óháðum erlendum aðilum. Neytendur og heimili landsins hafi beðið lengi eftir því að fá á borðið raunsæja óháða greiningu á því hvort íslenska krónan sé að valda meiri vanda en hún leysir.
„Það er ekki boðlegt að heimilin búi áfram við okurvexti, verðtryggingu, fákeppni og óstöðugleika án þess að fá skýra mynd af því hvort þetta eigi rót sína að rekja til gjaldmiðilsins sjálfs. Sumir segja að það sé krónunni sjálfri um að kenna að hér ríki fákeppni á flestum sviðum,“ segir Vilhjálmur og bætir við að nauðsynlegt sé að ríkisstjórnin standi við loforðið og upplýsi um stöðu málsins.
„Hvenær verður þessi úttekt af óháðum erlendum sérfræðingum kynnt og hvar stendur málið í dag? Það er réttlætiskrafa neytenda og heimila að fá þessi svör upp á borðið,“ segir Vilhjálmur en í dag eru liðnir 165 dagar síðan stefnuyfirlýsing ríkisstjórnarinnar leit dagsins ljós.
