Í umfjöllun Vísis um málið nú í morgunsárið kemur fram að eiginkona mannsins hafi haft samband við Neyðarlínuna eftir að maðurinn hneig niður af völdum hjartaáfalls. Hann var fluttur á Landspítalann í kjölfarið þar sem hann lést.
Í umfjöllun DV í gær kom fram að fjölskyldan sé talin vel efnuð og ekki með nein tengsl við undirheima eða afbrot. Fólkið býr í glæsilegu einbýlishúsi í Garðabæ. Nágrannar fjölskyldunnar sem DV hefur leitað til hafa ekki viljað tjá sig um málið vegna náinna tengsla og hve viðkvæmt málið er.
Rannsóknin beinist að því hvort dóttirin hafi átt þátt í dauða föður síns og hefur Vísir eftir heimildum sínum að fólk sem þekkir til fjölskyldunnar hafi haft áhyggjur af samskiptum dótturinnar við foreldra sína að undanförnu. Hún hafi sýnt af sér hegðun sem megi flokka sem „allt frá mikilli frekju yfir í andlegt og líkamlegt ofbeldi“ eins og það er orðað í frétt Vísis.
Eins og komið hefur fram var dóttir mannsins handtekin á föstudag og úrskurðuð í gæsluvarðhald til miðvikudags.
