Páll Einarsson, prófessor emeritus í jarðeðlisfræði við Háskóla Íslands, segir að atburðirnir á Reykjanesskaga skeri sig nokkuð úr miðað við fyrri atburði á þessu svæði á undanförnum árum.

Páll er í viðtali í Morgunblaðinu í dag um eldgosið sem hófst á Reykjanesskaganum í gærmorgun en gosið stóð mjög stutt yfir í samanburði við önnur gos á þessu svæði.

Páll bendir í fyrsta lagi á að gangurinn sem fylgir þessum atburði sé miklu stærri og lengri en í síðustu gosum á svæðinu.

„Í öðru lagi er gosið frek­ar lítið og virðist hætt í þess­um töluðu orðum en gang­ur­inn held­ur áfram að lengj­ast. Í raun er þetta meira gangainn­skot held­ur en eld­gos sem þarna hef­ur átt sér stað,“ segir hann og bætir við að venjulega sé það þannig að skjálftavirknin hætti þegar gosin koma upp. Það gerðist ekki í gær.

„Skjálfta­virkn­in hélt áfram ótrufluð þrátt fyr­ir gos. Þetta er því gangainn­skot en gosið fylg­ir með,“ seg­ir Páll við Morgunblaðið.

Hann segir að atburðurinn minni á atburðina í Kröflu árið 1980.

„Í Kröflu þekkt­um við að kvikuinn­skot­in gátu hagað sér með mjög mis­mun­andi hætti. Gos sem varð í Kröflu­eld­um í mars árið 1980 minn­ir nokkuð á þetta en ör­ugg­lega á margt eft­ir að ger­ast enn. Gang­ur­inn er enn að lengj­ast og stefn­ir í norðaust­ur. Þar er skjálfta­virkni,“ segir hann.

Veðurstofa Íslands sendi frá sér tilkynningu um stöðu mála í morgun og í henni var bent á að engin virkni hafi sést á gossprungunni síðan í gær.

Fram kemur að upp úr klukkan 21 í gærkvöldi hafi farið að draga úr skjálftavirkni á svæðinu, en ef marka má yfirlit Veðurstofunnar yfir jarðskjálfta síðustu 48 tímana sést að enn er talsverð skjálftavirkni á svæðinu nú í morgunsárið.