James McClean neitaði að svara spurningum frá einum blaðamanni eftir að hann lék sinn fyrsta leik fyrir Derry City um helgina.

McClean, sem er fæddur í Derry, gekk til liðs við uppeldisfélag sitt í síðasta mánuði og hjálpaði liðinu til sigurs gegn Shamrock Rovers.

Eftir leikinn neitaði þessi 36 ára gamli kantmaður, sem hefur til að mynda leikið með Sunderland, WBA og Stoke á ferlinum, að mæta á blaðamannafund, að eigin sögn vegna nærveru blaðamannsins Paul Rowan.

McClean fór þó í viðtöl við fjölmiðla og útskýrði ákvörðun sína síðar á Instagram. Þar sakaði hann Rowan um að hafa reynt að fá hann og þáverandi landsliðsþjálfara Írlands, Martin O’Neill, í bann árið 2017 vegna ummæla eftir landsleik.

McClean kallaði blaðamanninn meðal annars „slímugt og huglaust sníkjudýr.“ Rowan hefur ekki svarað ásökununum beint, en staðfesti í umfjöllun sinni að McClean hafi neitað að svara spurningum vegna ágreinings þeirra á milli.