Úrskurðarnefnd umhverfis- og auðlindamála hefur frestað stöðvun starfsemi þvottaþjónustu fyrirtækisins Hreint í Kópavogi. Heilbrigðiseftirlit Garðabæjar, Hafnarfjarðar, Kópavogs, Mosfellsbæjar og Seltjarnarness hafði tekið ákvörðun um að stöðva starfsemina á grundvelli þess að ekkert starfsleyfi væri til staðar. Fyrirtækið segir hins vegar starfsemina ekki vera starfsleyfisskylda og að það væri ekki í samræmi við meðalhófsreglu stjórnsýslulaga að skilgreina lítinn hluta starfsemi fyrirtækisins sem þvottahús. Verður stöðvuninni frestað þar til meðferð málsins lýkur hjá nefndinni.
Heilbrigðiseftirlitið hafði sent fyrirtækinu tölvupóst í júní 2024 og bent því á að enn hefði ekki borist umsókn um starfsleyfi fyrir þvottahús í starfsstöð þess í Kópavogi. Nokkur tölvupóstsamskipti áttu sér stað í kjölfarið. Fyrirtækinu var tilkynnt með bréfi 7. mars 2025, að þrátt fyrir andmæli þess stæði heilbrigðiseftirlitið við ákvörðun að starfsemin væri starfsleyfisskyld. Til að knýja á um það væri fyrirhugað að stöðva þvottahúsþjónustu starfseminnar yrði ekki sótt um starfsleyfi fyrir 31. mars, þ.e.a.s. daginn í dag.
Fyrirtækið kærði í kjölfarið ákvörðunina til úrskurðarnefndarinnar meðal annars á þeim grundvelli að ekki mætti sjá að ákvörðun heilbrigðiseftirlitsins að fella starfsemina undir „þvottahús“ byggði á skýrum heimildum í lögum. Þá félli ákvörðun um að fella lítinn hluta starfseminnar undir skilgreininguna „þvottahús“ ekki undir meðalhófsreglu og ljóst sé að hægt væri að ná markmiðum og tilgangi laganna á vægari hátt.
Á heimasíðu fyrirtækisins er tíundað hvers konar þjónustu það býður upp á og virðist það einkum vera ræstingar og hvers kyns hreingerningar. Meðal þess sem fyrirtækið býður upp er „þvottaþjónusta“ en í kynningu segir að í henni felist að viðskiptavinir leigi vörur fyrir kaffistofur og salerni sem Hreint sér síðan um að þvo. Miðað við meðfylgjandi mynd virðist þar einkum vera um að ræða handklæði, viskustykki, tuskur og þess háttar. Hvort Heilbrigðiseftirlitið sé að krefjast starfsleyfis fyrir þennan hluta starfseminnar er hins vegar ekki fyllilega ljóst.
Fór fyrirtækið fram á að stöðvun starfseminnar yrði frestað á meðan ákvörðun Heilbrigðiseftirlitsins væri til skoðunar hjá nefndinni. Mótmælti Heilbrigðiseftirlitið því ekki.
Úrskurðarnefnd umhverfis- og auðlindamála varð við því að fresta stöðvun starfseminnar á meðan málið er til meðferðar hjá nefndinni meðal annars á þeim grundvelli að um íþyngjandi ákvörðun sé að ræða sem beinist aðeins að Hreint og engar knýjandi ástæður séu til staðar sem valdi því að varhugavert sé að bíða niðurstöðu nefndarinnar.
