Björn, sem starfar fyrir Samstöðina, skrifaði pistil í gær þar sem hann sagðist ekki sjá betur en að ríkisstjórn Kristrúnar Frostadóttur væri umkomulaus, ef ekki vonlaus.
„Ráðherrar stjórnarinnar virðast dularfull blanda af barnalegu fólki sem finnst allt merkilegt sem það gerir sjálft og liði sem fer alltaf að tala um loftkennd afrek í framtíðinni þegar spurt er um gjörðir dagsins í dag,“ sagði Björn sem skipaði sjálfur 3. sætið á lista Flokks fólksins í Reykjavík norður og náði kjöri sem varaþingmaður.
Hann sagði síðan úr flokknum í janúarmánuði þar sem hann sagðist vilja einbeita sér að blaðamennskunni.
Björn taldi upp ýmislegt í pistli sínum sem hann telur að hefði mátt fara betur og spurði hvers vegna stjórnin sýni ekki meiri hugdirfsku í hinum ýmsu málum.
„Kjósendur þessara þriggja flokka vildu meiri jöfnuð, meiri auðmýkt, víðari heimssýn og meiri væntumþykju gagnvart þeim sem standa höllum fæti. Kjósendur vildu að ráðist yrði gegn fákeppni, kjósendur fyrirlitu íslensku bankana sem hafa misst alla samfélagslega ábyrgð, kjósendur vildu breytta efnahagsstefnu, kjósendur sættu sig ekki við að 20 Íslendingar eigi allt landið og miðin, kjósendur báðu um hugdirfsku. Kjósendur hafa ekki beðið um að hlutlausri friðlausri þjóð með engan her skuli att út í allar skyldur stórþjóða.“
Hann nefnir svo að Þorbjörg Sigríður Gunnlaugsdóttir dómsmálaráðherra hafi fengið tækifæri til að fækka hæstaréttardómurum.
„Ef ráðherra hefði notað tækifærið til að sýna sliguðum og skattpíndum almenningi sem horfir daglega á sóun fjármuna allt í kring í efsta lagi, að trúverðugleiki fylgi títtnefndu hagræðingarsamráði, þá væri almenningur kannski að upplifa þótt ekki væri nema örlitla von um að eitthvað hefði raunverulega breyst. Í stað þess að upplifa sama graut í sömu skál. Sömu úldnu skálinni,“ sagði hann og lét að því liggja að stjórnin óttist hina „freku og voldugu“.
Össur Skarphéðinsson, sem var þingmaður lengi og ráðherra um nokkurra ára skeið, gagnrýndi skrif Björns.
„Hissa að sjá þaulreyndan blaðamann skrifa af svona barnaskap. Hvað eru liðnar margar vikur fra því lyklavöld færðust? 8 – 10? Og haukar Samstöðvar skilja ekkert í að ekki er búið að uppfylla kosningaloforðin! Greinilegt að þar geta menn ekki beðið blóðnátta,“ sagði hann.
Annar fyrrverandi ráðherra Samfylkingarinnar, Björgvin G. Sigurðsson, tók í svipaðan streng.
„Nú er hátt reitt til höggs og ótímabær dómur felldur. Þau hafa ekki enn setið í 3 mánuði í ríkisstjórn og útilokað að dæma af verkum þeirra sem eru rétt að hefjast. Vitaskuld er eitt og annað sagt sem hefði verið ósagt, eða öðruvísi. Fólk er að fóta sig hratt á nýju sviði það sem ljósin skína skært,“ sagði Björgvin og bætti við að stjórnin hefði farið vel af stað, að hans mati, og lagt mikið upp úr því að standa við helstu kosningaloforð.
„Mörg fyrirheitanna koma fram þegar líður á kjörtímabilið. Til dæmis kosning um framhald viðræðna við ESB. Það mál sem td ræður atkvæði mínu þegar ég kýs til Alþingis. Stjórnarflokkarnir hafa alla burði til að standa sig vel og stjórna í þágu almannahagsmuna – í stað linnulítilla sérhagsmunagæslu ráðandi afla mest allan lýðveldistímann. Þær eru skörungar sem fara fyrir stjórninni – treysti þeim til góðra verka.“
