Árni B. Halldórsson hefur verið ákærður fyrir meiriháttar skattalagabrot í rekstri fyrirtækisins K 116 sem áður hét Járnborg. Árni var þar framkvæmdastjóri, stjórnarmaður og prókúruhafi.

Árni er annars vegar sakaður um að hafa ekki staðið skil á staðgreiðslu opinberra gjalda fyrir árin 2019 til 2021. Nema meint vanskil rúmlega 26 milljónum króna.

Hins vegar er hann sakaður um hafa staðið skil á efnislega röngum virðisaukaskattskýrslum fyrir sömu rekstrarár og nemur offramtalinn innskattur, samkvæmt ákæru, um 72,5 milljónum króna, og vanframtalinn útskattur rúmlega 15 milljónum króna.

Járnborg var byggingafyrirtæki sem sérhæfði sig í járnabindingum. Félagið var stofnað árið 2014 og úrskurðað gjaldþrota árið 2021.

Járnborg var í fréttum sumarið 2019 er eldsvoði varð í atvinnhúsnæði að Fornubúðum í Hafnarfirði degi áður en fyrirtækið átti að flytja inn í það, og varð ekki af flutningunum. Sjá nánar um málið hér.

Málið gegn Árna verður þingfest við Héraðsdóm Reykjaness 19. júní næstkomandi.