Trump hefur áður ítrekað lýst því yfir síðustu vikur og mánuði að hann vilji að Bandaríkin taki yfir nágranna okkar Íslendinga á Grænlandi og hefur hann meira að segja ekki útilokað að beita hervaldi til þess.
Grænland fékk heimastjórn frá Danmörku árið 1979 en er sjálfstjórnarsvæði innan dönsku ríkisheildarinnar.
Í ræðu sinni í gær sagðist hann meðal annars vera með skilaboð til „yndislega“ fólksins á Grænlandi.
„Við styðjum rétt ykkar til að ákvarða eigin framtíð og ef þið viljið munum við bjóða ykkur velkomin inn í Bandaríkin.“
Hann bætti svo við að Bandaríkin þurfi á Grænlandi að halda, ekki einungis vegna þjóðaröryggis heldur vegna alheimsöryggis. „Og við erum að vinna að því, með öllum sem hlut eiga að máli, að reyna að ná Grænlandi. Og ég held að við munum ná því á einn eða annan hátt. Við munum ná því,“ sagði hann.
Þá sagði hann að Grænlendingar ættu von á góðu ef þeir fara undir Bandaríkin. Bandaríkin muni ekki einungis tryggja öryggi landsins heldur gera það ríkt og taka það í „áður óþekktar hæðir“ eins og hann orðaði það.
Trump á mikið verk fyrir höndum að sannfæra Grænlendinga um kosti þess að fara undir Bandaríkin. Samkvæmt skoðanakönnun sem framkvæmd var í janúar eru 85% Grænlendinga mótfallnir því að sameinast Bandaríkjunum.
