Grímur Grímsson, yfirlögregluþjónn hjá miðlægri rannsóknardeild lögreglunnar á höfuðborgarsvæðinu, segir í samtali við Vísi að lögreglan ætli ekki að eyða tíma í að eltast við sögusagnir í Krýsuvíkurmálinu. 

Engar ábendingar eða sönnunargögn hafi borist til lögreglu umfram það sem Sigurður Fannar Þórsson sem situr í gæsluvarðhaldi hefur sagt lögreglu.

Sigurður Fannar var handtekinn á sunnudagskvöld grunaður um að hafa orðið Kolfinnu Eldeyju, tíu ára dóttur sinni, að bana. Sigurður Fannar hringdi sjálfur í lögreglu og að hann hefði banað dóttur sinni. Hann var handtekinn og í gær var hann úrskurðaður í gæsluvarðhald til 24. september.

Grímur segir í samtali við Vísi að fólk tengt Sigurði Fannari og hans fjölskyldu hafi gefið skýrslur hjá lögreglu í dag. Sigurður Fannar var ekki yfirheyrður í dag. Meðal þess sem er til rannsóknar sé hvar stúlkan lét lífið líkt og DV greindi frá fyrr í dag. 

Sögusagnir hafa gengið manna á milli á samfélagsmiðlum og víðar um manndrápið. Grímur segir lögregluna ekki eltast við slíkar sögusagnir. 

Rétt er að minna á að telji einstaklingar sig hafa upplýsingar um þetta sakamál, eða önnur, geta viðkomandi sett sig í samband við lögregluna.