Grímur Grímsson, yfirlögregluþjónn á rannsóknarsviði Lögreglunnar á höfuðborgarsvæðinu, segir að ákvörðun um gæsluvarðhald yfir manni sem er í haldi lögreglu, grunaður um morð á barni, verði tekin á næstu klukkutímum.
„Varðandi mál sem við erum með til rannsóknar og varðar manndráp þá verður tekin ákvörðun um það mjög fljótlega hvort viðkomandi verður færður fyrir dómara,“ segir Grímur í samtali við DV.
Fjölmiðlar hafa greint frá því að hinn grunaði sé faðir þolanda, tíu ára gamallar stúlku. Hann hafði samband við lögreglu um kvöldmatarleytið í gærkvöld og var þá staddur á Krýsuvíkursvæðinu þar sem lögregla handtók hann.
Aðspurður segist Grímur á þessu stigi ekkert geta staðfest um aldur þolandans né tengsl þolanda og geranda. „Ég get á þessu stigi ekkert staðfest um það, við erum ennþá að fá fullvissu um að búið sé að ná í alla sem þörf er á að ná í,“ segir Grímur.
Hann segir of snemmt að fullyrða um hvort lögregla sé komin með skýra mynd af atburðinum. „Það er of snemmt að hafa þau orð um það vegna þess að þetta er bara það nýskeð. Við erum bara að ná utan um það,“ segir Grímur.
