Guðrún hefur heimsótt öll fangelsi landsins að Kvíabryggju undanskilinni og ræddi hún stöðu mála í Bítinu á Bylgjunni í morgun.
Töluvert hefur verið rætt og ritað um stöðu fangelsismála og ekki síst öryggi fangavarða eftir að fangi réðst á þrjá fangaverði á dögunum með þeim afleiðingum að þeir þurftu að leita aðhlynningar á spítala.
Heiðar Smith, formaður félags fangavarða, sagði í Bítinu í síðustu viku að sá hópur sem afplánar sé orðinn erfiðari og algengara sé að andlega veikt fólk afpláni dóma. Kvaðst hann vonast til þess að árásin á dögunum verði til þess að brugðist verður við.
Guðrún sagði í Bítinu að hún hefði haft áhyggjur af starfsumhverfi fangavarða og erfiðu ástandi innan fangelsa landsins. Þá hefði hún haft áhyggjur af þeirri aðstöðu sem föngum, fangavörðum og aðstandendum fanga er boðið upp á, sérstaklega á Litla-Hrauni.
„Mér var mjög brugðið að koma á Litla-Hraun,“ sagði Guðrún í viðtalinu og benti á að aðalbyggingin hefði verið byggð árið 1929. „Hún var ekki byggð sem fangelsi heldur sem sjúkrahús fyrir Sunnlendinga en aldrei tekin í notkun sem slík.“
Síðan þá hefur verið byggt ítrekað við aðalbygginguna og er starfsemin nú í alls um níu húsum.
„Húsakosturinn er má segja nær allur óviðunandi og lélegur og þess vegna ákvað ég á mínum fyrstu vikum í embætti að hefja tafarlaust uppbyggingu á nýju fangelsi,“ sagði Guðrún og bætti við að eins og staðan er í dag sé erfitt að tryggja öryggi fanga og starfsmanna, þar á meðal fangavarða. Guðrún kveðst binda vonir við að nýtt fangelsi verði byggt hratt upp nú þegar þarfagreiningu er lokið og komin drög að teikningum.
Guðrún tók undir orð Heiðars Smith þess efnis að staða margra fanga sé þyngri en hún hefur oft verið. Aðspurð hvort til greina kæmi að fangaverðir fengju rafbyssur eins og lögreglan sagði Guðrún að engin ákvörðun hefði verið tekin um slíkt. „Það er bara eitthvað sem verður skoðað í framhaldinu.“
