Nýnasistasamtök á Norðurlöndum nota bardagaíþróttir til þess að laða að nýja meðlimi. Í Finnlandi dreifðust meðlimir Norðurvígis í önnur samtök eftir lögbann.
Samtök eins og Norðurvígi reyna einkum að laða að reiða unga menn. Menn sem hafa áhuga á valdbeitingu og átökum. Í frétt finnska ríkisútvarpsins YLE segir að fjölmargir bardagaklúbbar hafi sprottið upp sem ýti undir öfgahægrisinnaða hugmyndafræði. Finnska leyniþjónustan, Supo, fylgist grannt með þróuninni.
Einn slíkur klúbbur nefnist Active Club Finland. Í sumar var haldnar sumarbúðir í bænum Ruovesi á vegum klúbbsins sem titlaðar voru White Boy Summer Fest. Voru þar samankomnir nýnasistar til þess að æfa fangbrögð og tilbiðja húðlit sinn.
Aðrir klúbbar sem ýta undir nýnasisma eru til að mynda Tulenvaki og Veren Laki. Að sögn Supo skipuleggja þessir klúbbar ýmis konar samkomur, tónlistarhátíðir og bardagaíþróttakeppnir. Oft er það sama fólk sem tengist inn í marga klúbba. Er því um eins konar net að ræða.
Þekktustu nýnasistasamtökin á Norðurlöndum eru Norðurvígi, sem bandarísk stjórnvöld skilgreindu nýverið sem hryðjuverkasamtök. Samtök sem stofnuð voru í Svíþjóð en hafa deildir á öllum Norðurlöndum, meðal annars á Íslandi.
Í Finnlandi var starfsemi Norðurvígis bönnuð árið 2019. En það var eftir að meðlimur samtakanna hafði stungið tólf ára barn af erlendum uppruna með hnífi í verslunarmiðstöð.
Engu að síður eru allir fyrrverandi meðlimir Norðurvígis í Finnlandi áfram starfandi í áðurnefndu neti af klúbbum og halda áfram að upphefja öfgahægri hugmyndafræði opinberlega. Að sögn Niko Pyrhönen, sérfræðingi í öfgahægri pópúlisma, er það auðveldara fyrir nýnasista að starfa í laustengdu neti smærri klúbba en í einum stórum.
„Það er líka erfiðara fyrir stjórnvöld að grípa í taumana þegar um er að ræða marga hópa,“ sagði Pyrhönen við YLE.
Markmið klúbbs eins og Active Club er að dreifa hvítri þjóðerniskennd á duldari hátt en áður. Leið sem hefur verið titluð Þjóðernishyggja 3.0 og þekkist víða annars staðar.
Active Club er nú með starfsstöðvar á sex stöðum í Finnlandi, þar á meðal tveimur af stærstu borgunum, Turku og Tampere.
Út á við virðist áhersla klúbbsins vera á iðkun sjálfsvarnaríþrótta, sjálfsbætingu og heilbrigðan lífsstíl. Þetta séu gildi sem margir aðrir en nýnasistar geti tekið undir. Áróðurinn fyrir hvítum yfirburðum og kynþáttahatri er því lúmskari en áður.
