Sex gestir fundust látnir með dularfullum hætti á Grand Hyatt-lúxushótelinu í miðborg Bangkok í gær. Starfsfólk hótelsins vitjaði gestanna eftir að þeim hafði láðst að skrá sig út af hótelinu á réttum tíma en fundu þá aðeins lík gestanna. Fjórir hinna látnu eru víetnamskir ríkisborgarar en að auki voru tveir bandarískir ríkisborgar, af víetnömskum uppruna, í hópi hinna látnu. Um var að ræða þrjá karla og þrjár konur. Athygli vekur að fólkið hafði bókað hótelgistingu fyrir sjö manns en lögregla leitar nú að þeim aðila.

Grunur leikur á að eitrað hafi verið fyrir fólkinu og mögulega hafi þau drukkið blásýrublandað te. Engin merki voru um neinskonar ofbeldi né virðist nokkru hafa verið rænt af fólkinu. Þá er lögreglan sannfærð um að fólkið hafi ekki skaðað sig sjálft.

Í umfjöllun CNN kemur fram að fólkið hafi pantað mat og drykki, eins og te, upp á herbergið en maturinn hafi verið ósnertur þegar lík fólksins uppgötvaðist. Þá fundust leifar af hvítu dufti í herberginu sem lögreglu grunar að sé blásýra. Merki voru um að einn hinna látnu hafi reynt að hlaupa að herbergishurðinni en ekki náð í tæka tíð áður en hann féll örendur til jarðar.

Málið er litið afar alvarlegum augum í Tælandi enda hefur ferðamannaiðnaðurinn, sem er landinu afar mikilvægur,  aðeins átt undir högg að sækja og hafa yfirvöld reynt að blása lífi í glæðurnar. Til að mynda með því að rýmka reglur um vegabréfsáritun til landsins fyrir fjölmörg þjóðerni.

Forsætisráðherra Tælands, Srettha Thavisin, boðaði strax umfangsmikla lögreglurannsókn og sagðist vona að hið dullarfulla mál muni ekki skaða ferðamannaiðnaðinn í landinu.