Páll Magnússon, forseti bæjarstjórnar Vestmannaeyjar, segir það siðferðislega óásættanlegt að tjóni sem varð á vatnsleiðslu til bæjarins, verði varpað á íbúa. Þetta kemur fram í færslu bæjarfulltrúans á Facebook en þar vakti hann athygli á einróma afstöðu bæjarstjórnar þar sem samþykkt var með níu samhljóða atkvæðum í vikunni að höfða mál gegn útgerð Vinnslustöðvarinnar vegna málsins og krefjast fulltra bóta.
Tjónið átti sér stað í nóvember síðastliðnum þegar akkeri Hugins VE, skipi Vinnslustöðvarinnar, festist í vatnslögninni og olli stórtjóni. Vestmannaeyjarbær og HS Veitur hafa farið fram á fullar bætur frá útgerðarfyrirtækinu upp á 1,5 milljarð króna en því hafa forsvarsmenn útgerðarinnar og tryggingarfélag hafnað og viljað ná samkomulagi um að takmarka bæturnar við 360 milljónir króna samkvæmt heimildarákvæði í siglingalögum.
Páll, eins og aðrir bæjarfulltrúar, eru ósáttir við þessa afstöðu fyrirtækisins og hvetur hann forsvarsmenn þess til þess að sýna samfélagslega ábyrgð.
„Þrátt fyrir umrætt heimildarákvæði er ekkert sem bannar Vinnslustöðinni að bæta að fullu það tjón sem fyrirtækið hefur valdið bæjarbúum. Það væri viðskiptaleg ákvörðun sem félaginu er fyllilega heimilt að taka. Tjónið er gríðarlegt og nemur a.m.k. 300 þúsund krónum á hvern bæjarbúa. Það er siðferðislega óásættanlegt að þessu tjóni verði eingöngu velt yfir á íbúa í Vestmannaeyjum með hækkun skatta og gjalda á meðan tjónvaldurinn sjálfur, Vinnslustöðin, sé eini málsaðilinn sem komi skaðlaus frá því tjóni sem hún olli,“ skrifar Páll.
Segir hann ennfremur að Vinnslustöðin hafi hafnað óskum Vestmannaeyjarbæjar um viðræður vegna málsins og því telur bæjarstjórn óumflýjanlegt að sækja bætur fyrir dómstólum og gæta þannig hagsmuna bæjarbúa.
