Annalena Baerbock, utanríkisráðherra Þýskalands, heimsótti Úkraínu á þriðjudaginn og ræddi við þarlenda ráðamenn í Kiyv. Ferð hennar er nýjasta dæmið um stuðning Vesturlanda við Úkraínu. Ferðin kom á sama tíma og spurðist út að Þjóðverjar hyggist efla stuðning sinn við Úkraínu til mikilla muna.

Baerbock hvatti bandalagsríki Úkraínu til að senda fleiri loftvarnarkerfi til landsins þar sem Rússar láti flugskeytum og sprengjum rigna yfir landið þessar vikurnar.

Þjóðverjar hafa lagt drjúgt af mörkum í hernaðaraðstoð við Úkraínu, aðeins Bandaríkjamenn hafa verið rausnarlegri.

Reuters hafði eftir heimildarmanni innan þýska stjórnkerfisins að Þjóðverjar ætli að verja 3,8 milljörðum evra til viðbótar í hernaðarstuðning við Úkraínu á þessu ári. Áður höfðu þeir eyrnamerkt 7,1 milljarða evra til kaupa á vopnum og skotfærum á þessu ári. Bild skýrir frá þessu.

Fjármálaráðuneytið hefur nú þegar farið fram á að 15 milljörðum evra verði varið í hernaðaraðstoð við Úkraínu á næsta ári.