Í tilkynningu á vef Seðlabanka Íslands kemur fram að fjármálaeftirlit Seðlabankans hafi komist að þeirri niðurstöðu að Prosegur Change Iceland ehf. sé hæft til að fá skráningu sem veitandi gjaldeyrisskiptaþjónustu samkvæmt lögum um aðgerðir gegn peningaþvætti og fjármögnun hryðjuverka. Þetta þýðir að gjaldeyrisskiptastöðvar undir merkjum ChangeGroup hafa öðlast nauðsynleg starfsleyfi til að taka til starfa á Keflavíkurflugvelli tveimur og hálfum mánuði eftir að fyrirtækið tók við fjármálaþjónustu á flugvellinum, eftir að Isavia samdi við það í kjölfar útboðs á síðasta ári.
Eins og DV greindi nýlega frá var ChangeGroup stofnað í Bretlandi en er nú í eigu spænska fyrirtækisins Prosegur. ChangeGroup rekur meðal annars gjaldeyrisskiptastöðvar á flugvöllum víða um heim en einnig eru reknar gjaldeyrisskiptastöðvar undir merkjum móðurfélagsins og bera þá heitið Prosegur Change. Eins og fram kom í frétt DV lá fyrir þegar Isavia samdi við fyrirtækið um að veita fjármálaþjónustu á flugvellinum meðal annars með því að reka gjaldeyrisskiptastöðvar að það hefði ekki starfsleyfi til að starfrækja slíkar stöðvar hér á landi. Engin gjaldeyrisskiptastöð hefur því verið til staðar á Keflavíkurflugvelli síðan í byrjun febrúar, þegar ChangeGroup tók við allri fjármálaþjónustu á flugvellinum. Það var hins vegar einkum skýrt með því að opnun þeirra hefði tafist vegna framkvæmda.
Farin var sú leið að stofna íslenskt dótturfélag, Prosegur Change Iceland ehf., og sótti það um starfsleyfi. Fjármálaeftirlit Seðlabankans hefur nú veitt leyfið og þar með er væntanlega ekkert því til fyrirstöðu, hvað varðar nauðsynleg leyfi, að gjaldeyrisskiptastöðvarnar geti tekið til starfa.
