Í Lögbirtingablaðinu í dag er birt áskorun frá sýslumanninum á höfuðborgarsvæðinu til íslenskrar konu á tíræðisaldri um að gefa sig fram og vitja arfs sem hún á inni.

Í áskoruninni kemur fram að í síðastliðnum mánuði hafi verið lokið einkaskiptum á dánarbúi manns sem fæddur var um miðja síðustu öld. Það kemur ekki fram hvenær maðurinn lést en líklega hefur það verið á síðasta ári og var hann því á áttræðisaldri þegar hann lést.

Meðal erfingja mannsins er umrædd kona sem er tæplega 20 árum eldri en hann. Hún er sögð systir hins látna en þau eru ekki kennd við sama föður og svo virðist því sem þau geti hafa verið hálfsystkini sammæðra.

Tekið er fram í áskoruninni að talið sé að konan sé búsett í Bandaríkjunum en hún hafi ekki gefið sig fram og ekki sé vitað hvar sé hægt að ná til hennar.

Það kemur ekki fram í áskoruninni hversu há upphæð arfsins, sem bíður eftir konunni, er en tekið er fram að hún geti vitjað hans hjá skiptasviði sýslumannsins á höfuðborgarsvæðinu.

Konunni er þó gefinn rúmur tími til að nálgast arfinn. Gefi hún sig ekki fram innan 10 ára frá birtingu áskoruninnar, geta erfingjar hennar krafist þess að fá það afhent eins og hún hefði ekki lifað þegar arfurinn kom til sögunnar. Komi slík krafa, frá erfingjum konunnar, ekki fram innan eins árs frá lokum þess 10 ára frests sem henni er gefinn, til að nálgast arfinn, skal sýslumaður greiða féð í ríkissjóð.