Samkvæmt niðurstöðum könnunarinnar sögðust 7% vilja sjá Ólaf Jóhann sem næsta forseta, 9% nefndu Katrínu Jakobsdóttur forsætisráðherra og 14% sögðust vilja hafa Guðna Th. Jóhannesson áfram. Á eftir Ólafi sem var í þriðja sæti komu Halla Tómasdóttir (6%) og Arnar Þór Jónsson (4%).
Í nýjasta tölublaði Heimildarinnar birtist stutt viðtal við Ólaf þar sem hann er spurður út í það hvort hann ætli í forsetaframboð. Ólafur segist ekki vera farinn að íhuga það alvarlega og bætir við að forsetaembættið sé embætti sem fólk ætti ekki að sækjast í persónulega.
„Ég hef alltaf fyrirvara þegar fólk sækist í þetta persónulega. Heillar þetta mann? Jú, en þá er alltaf stutt í egóið og hégómleikann, það er ekki alveg það sem knýr mig áfram. Ég er eflaust með marga galla en hégómleikinn er ekki einn af þeim, ég hef aðra,“ segir hann við Heimildina.
Sem fyrr segir hefur Ólafur áður verið orðaður við forsetaembættið, síðast árið 2016 og miðað við svör hans nú virðist sitthvað hafa breyst síðan þá.
„Síðast var þetta mjög einfalt fyrir mig, það kom einfaldlega ekki til greina, ég var bara í allt öðru og var að reyna að reka einhver stórfyrirtæki.“
Þó Ólafur sé ekki farinn að velta framboði fyrir sér alvarlega virðist hann ekki útiloka það. Nánar er rætt við hann í Heimildinni.
