Minningarathöfn verður haldin um Lúðvík Pétursson næstkomandi föstudag, 9. febrúar. Lúðvík féll niður um sprungu í Grindavík þann 10. janúar.
Athöfnin verður haldin í Langholtskirkju í Reykjavík og hefst klukkan 15:00.
„Á föstudaginn munum við minnast Lúlla bróður og alls þess góða sem ef honum stafaði,“ segir Elías Pétursson, verktaki og fyrrverandi bæjarstjóri í Fjallabyggð. „Kannski er ekki úr vegi að geta þess að ég, Lúlli og samstarfsfélagar okkar gerðum lóðina við Langholtskirkju… sé ekki betur en sú framkvæmd eldist vel líkt og annað sem Lúlli kom nálægt.“
Lúðvík féll niður um sprungu þar sem hann var við framkvæmdir. Hann var einn á staðnum og verkfæri fundust í sprungunni. Sprungan var tugir metrar á dýpt og neðst í henni flæðandi grunnvatn. Þann 12. janúar var ákveðið að hætta leit vegna þess að ekki var talið forsvaranlegt að senda sigmenn niður í sprunguna.
Aðstandendur hafa farið fram á að aðdragandi slyssins og aðstæður á vettvangi verði rannsakaðar af sjálfstæðum og óháðum aðilum.
Lúðvík var fæddur 22. ágúst 1973 og skildi hann eftir sig fjögur börn, unnustu, tvö stjúpbörn og tvö barnabörn.
Söfnun er í gangi fyrir börn Lúðvík, á nafni og kennitölu Ásu Kristínar dóttur hans. Þau sem vilja styrkja og hafa tök á geta lagt inn á neðangreindan reikning:
Kennitala: 090499-2039
Reikningur: 0123-15-119662
