Sigríður Hagalín Björnsdóttir, fréttamaður á RÚV, hefur vakið mikla athygli fyrir skáldsögur sínar undanfarin ár og kemur því líklega fáum á óvart að hún hafi hlotið 12 mánaða starfslaun listamanna fyrir árið 2025.
Sigríður er einnig landsþekkt fyrir störf sín hjá sjónvarpi allra landsmanna og því vaknar sú spurning hvort hún fari í starfsleyfi frá RÚV á meðan hún nýtur starfslauna. Sigríður segist aðspurð ýmist vera í leyfi frá störfum eða í hlutastarfi hjá RÚV á meðan starfslauna nýtur:
„Í 7. grein reglugerðarinnar um starfslaun listamanna segir: „Fullt starf í skilningi þessara laga miðast við 67% starf eða meira. Þeir sem njóta starfslauna í sex mánuði eða lengur skulu því ekki gegna öðru starfi sem telst meira en þriðjungur úr stöðugildi meðan þeir fá greidd starfslaun enda hindri það ekki listamanninn í því að sinna því verkefni sem starfslaunin voru veitt til.“ Þannig að ég verð ýmist í leyfi eða vinn undir 33% á RÚV á næsta ári, eins og ég hef gert hingað til á meðan ég er á starfslaunum. Ég er svo heppin að eiga skilningsríkan vinnuveitanda sem veitir mér svigrúm til að stilla vinnuna af þannig að ég geti skrifað. Það er ágætt að hafa í huga að þessar 560.000 krónur eru greiddar út í verktöku, við eigum eftir að greiða af þeim skatta og launatengd gjöld. Eftir standa um 380.000 krónur á mánuði, sem eru hin raunverulegu listamannalaun.“
Sigríður segir jafnframt að hún kunni afar vel að meta úthlutunina. „Ég er glöð og þakklát fyrir úthlutunina.“
