Ísraelska njósnafyrirtækið Black Cube, og íslensk og erlend náttúruverndarsamtök stóðu að baki tálbeituaðgerð sem beindist að Gunnari Bergmann Jónssyni fyrrverandi formanni Félags hrefnuveiðimanna, syni Jóns Gunnarssonar fyrrum dómsmálaráðherra.

Heimildin afhjúpaði málið þann 11. nóvember, en á upptökum teknum af huldumanni sem sagðist vera svissneskur fjárfestir, full­yrð­ir Gunnar að Jón hafi sam­þykkt beiðni Bjarna Bene­dikts­son­ar um að þiggja sæti á lista gegn því að Jón kom­ist í að­stöðu til að veita veiði­leyfi til Hvals hf. Það verði arf­leifð Jóns að tryggja Kristjáni Lofts­syni nán­um vini sín­um leyf­ið. Það sé hins veg­ar eitt­hvað sem eigi að fara leynt.

Sjá einnig: Heimildin birtir fréttina sem byggist á leyniupptökunum:„Við getum aldrei talað um að hann sé að gera það fyrir vin sinn“

Upptökurnar voru teknar upp á Edition-hótelinu þar sem huldumaðurinn og Gunnar sátu saman að kvöldverði. Til Heimildarinnar rötuðu myndbandsupptökur sem virðast hafa verið tekin upp á tveimur fundum Gunnars með manninum sem hann taldi erlendan fjárfesti á höttunum eftir milljarða viðskiptatækifærum á Íslandi.

Í umfjöllun ísraelska fjölmiðilsins Ynetnews í gær er rætt við Giora Eiland ráðgjafa fyrir Black Cube og fyrrverandi formann öryggisráðs Ísraelsríkis. Þar kemur fram að náttúruverndarsamtökin hafi sett sig í samband við Black Cube fyrir nokkrum mánuðum síðan til að rannsaka meinta spillingu sem tengdist íslenskum stjórnmálum og viðskiptalífi. Undirbúningur Black Cube fólst í umfangsmikilli rannsóknarvinnu. 

„Og svo gerðum við það sem við gerum sem fyrirtæki í öllum verkefnum,“ útskýrir Eiland. „Ítarleg og nákvæm rannsókn á netinu, mannmiðuð rannsókn á vinum, fjölskyldumeðlimum, samstarfsfólki og leit að einhverri glufu. Þegar við finnum hana vekjum við eitt af skuggafyrirtækjum okkar og sendum fulltrúa okkar, sem er reiprennandi í tungumáli viðfangsefnisins og kann að ná fram þeim upplýsingum sem viðfangsefnið býr yfir, á vettvang. Í þessu verki vissum við að það var Gunnar, sem er sjálfsöruggur og hefur tilhneigingu að slá um sig.“

Í umfjölluninni kemur fram að aðgerð Black Cube heppnaðist einstaklega vel. Gunnar hafi verið fljótur að upplýsa um djúpstæð tengsl fjölskyldu sinnar við hvalveiðipólitík og atvinnulíf, og hvernig fjölskylda hans myndi njóta góðs af. Málið hafi vakið mikla athygli í íslenskum fjölmiðlum og stöðvað allar umræður um hvalaveiðileyfi. „Þetta er góð tilfinning. Þetta var vel heppnuð aðgerð og enginn á Íslandi mun tala um hvalaveiðileyfi í bráð.“