Lögreglan á höfuðborgarsvæðinu hafði í gær afskipti af leiðbeinanda í æfingaakstri sem reyndist vera undir áhrifum áfengis. Viðkomandi var handtekinn og tekið úr honum blóðsýni til rannsóknar málsins. Frá þessu er greint í dagbók lögreglu og þar er árétta að leiðbeinandi í æfingaakstri ber lögum samkvæmt ábyrgð á akstrinum og skal því vera allsgáður.
Fram kemur að lögregla hafi verið með öflugt umferðaeftirlit í gærkvöldi og nótt og fjölmargir einstaklingar verið látnir blása. Sumir þeirra hafi fengið jákvæða svörun í mælinum en við frekari skoðun reynst undir mörkum.
Tveir fengu að dúsa í fangageymslum í nótt en alls voru 120 mál bókuð í skráningarkerfi lögreglu.
Eitt hið alvarlegasta er meint líkamsárás dyravarðar í miðbænum sem er til rannsóknar.
