Gunnar Smári Egilsson fjölmiðlamaður og frambjóðandi Sósíalistaflokksins í nýafstöðnum alþingiskosningum veltir upp þeirri hugmynd á Facebook-síðu sinni að Reykjavíkurborg taki upp viðmiðunarverð á veitingastöðum til að sporna við of hárri verðlagningu.
Tilefni pistilsins er frétt RÚV um að borgaryfirvöld í Róm hafi tekið upp viðmiðunarverð á hinum vinsæla rétti spaghetti carbonara á veitingastöðum borgarinnar. Verðið er 12 evrur, um 1.750 íslenskar, en dæmi er um að rétturinn sé seldur á 20 til 30 evrur, 2.900 til 4.400 íslenskar krónur. Hér er þó ekki um skipun yfirvalda til veitingamanna í Róm að ræða heldur viðmið sem á að vera hvatning til að hafa verðlagningu á réttinum sanngjarna. Veitingamenn vísa í háa húsaleigu til skýringa á verðlagningu sinni. Tilefni þessara aðgerða borgaryfirvalda í Róm er að búist er við metfjölda ferðamanna til borgarinnar á næsta ári vegna sérstaks hátíðarárs sem verður í Vatíkaninu.
Í færslu Gunnars Smára ber hann viðmiðunarverðið í Róm saman við verðið á sama réttinum í Reykjavík:
„Verðið á Grazie Trattoria á Hverfisgötunni, sem er vinsælasti ítalski veitingastaðurinn samkvæmt Trip Advisor er 4.290 kr. sem er 145% yfir viðmiðunarverðinu í Róm.“
Gunnar Smári er þó áhugasamur um að borgaryfirvöld í Reykjavík gangi lengra í þessum efnum en borgaryfirvöld í Róm og líti fremur til Parísar:
„Kannski ættu borgaryfirvöld í Reykjavík að taka upp svona viðmiðunarverð. Jafnvel að tengja útgáfu veitingaleyfa við tiltekin verð eins og gert er í París. Þar er opinbert verðlag á kaffi, ákveðið verð ef þú drekkur það við barinn, aðeins hærra ef þú situr inni og eilítið hærra ef þú situr út á terrössunni. Það er líka bannað að rukka gesti fyrir vatnsglas. Og opinber verðlagning nær víða. Það er t.d. verðlagsnefnd sem ákveður hvað venjulegt baquette í bakaríum kostar. Sum bakarí fara fram hjá þessum með því að bjóða upp á súrdeigs-baquette en hin opinbera verðlagning er eftir sem áður viðmið sem bakaríin geta ekki farið langt frá.“
Gunnar Smári segir að lokum að rétti tíminn til að skoða aðgerðir af þessu tagi sé núna:
„Það er of seint að grípa til aðgerða þegar túristarnir eru flúnir.“
