Sara hefur verið hluti af hreyfingunni í tæpan áratug en í færslu á Facebook-síðu sinni tíundar hún ástæður þess að hún ákveður nú að láta gott heita.
„Síðustu fjórar Alþingiskosningar hef ég gefið kost á mér fyrir flokkinn og verið svo lánsöm að fá mikla þingreynslu sem varaþingmaður. Samanlagt 8 mánuði, næstum heilt þing. Það er ómetanleg reynsla að búa að. Hins vegar hef ég og áherslur mínar á td. sjálfsvígsforvarnir ekki hlotið jafnmikið brautargengi innan flokksins eins og ég hefði vonast eftir. Og nú þegar að flokkurinn er dottinn út af þingi er þetta allt fullreynt fyrir mig sem einstakling,“ segir hún og heldur áfram:
„Ég neita að trúa því að það sé náttúrulögmál að við missum um í einn á viku hérlendis á þann óbærilegan máta. Oft er það ungt fólk í blóma lífsins sem sér ekki fram úr erfiðleikunum og grípur til örþrifaráða. Stundum börn. Flest sjálfsvíg eru nefnilega fyrirbyggjanleg,“ segir hún.
Sara kveðst hafa áhyggjur af því að ný ríkisstjórn – hver sem hún verður – verði með málaflokkinn í hjáverkum þar sem ærin verkefni eru vissulega fram undan.
„Ég hef eignast fullt af dásamlegum vinum í flokknum sem verða það að sjálfsögðu áfram.
En ég er sko hvergi nærri hætt í pólitík og er full af eldmóði gagnvart þeim málefnum sem ég er vakin og sofin yfir. Aldeilis hreint ekki hætt heldur rétt að byrja!
Nú hefst ný vegferð sem ég hlakka til að hefja af krafti. Meira um það síðar,“ segir hún.
