Maðurinn var staddur á lestarstöðinni þann 10. desember þar sem hann festi kaup á lestarmiðum í gegnum sjálfsala í almenningsrými með notkun á greiðslukorti. Voru kaupin staðfest með PIN-númeri kortsins.
Svo virðist sem kortaveski mannsins hafi verið stolið á lestarstöðinni því hann tók eftir því þegar hann ferðaðist upp á flugvöll að veskið var horfið.
Strax í framhaldinu kveðst maðurinn hafa sett sig í samband við færsluhirði til að láta loka kortinu. Taldi maðurinn líkur á að kortaveski hans hafi verið stolið í mannmergðinni þegar hann fór í flugrútu og hinir óprúttnu aðilar hafi því haft skamman tíma enda áætlað að ferðin á flugvöllinn tæki ekki nema um 40 mínútur. Taldi maðurinn að á rétt ríflega 32 mínútum hafi þjófarnir framkvæmt 15 greiðslur að fjárhæð alls 265.872 kr.
Maðurinn fór fram á að fá endurgreiðslu vegna færslnanna og tók fram að PIN-númer kortsins hafi ekki verið geymt í veskinu sjálfu. Taldi hann að hinir óprúttnu aðilar hafi fylgst með honum þegar hann keypti miðana og sló inn PIN-númerið.
Fjármálafyrirtækið í málinu hafnaði kröfum mannsins í megin dráttum en féllst á að endurgreiða þrjár snertilausar færslur sem gerðar voru með debetkorti. Hinum var hafnað meðal annars í ljósi þess að þær voru staðfestar með PIN-númeri.
Úrskurðarnefndin klofnaði í afstöðu sinni til málsins en meirihluti nefndarinnar féllst þó að umrætt fjármálafyrirtæki greiddi manninum alla upphæðina sem tekin var af kortinu.
„Frásögn sóknaraðila er trúverðug og að nokkru marki studd gögnum, þ.m.t. um óeðlilega notkun kortsins eftir svikin. Hún felur í sér yfirgnæfandi líkur á að sóknaraðili hafi verið fórnarlamb svikahrappa sem hafi stolið korta- og PIN-upplýsingum af honum,“ segir í niðurstöðu meirihlutans.
Í niðurstöðu minnihlutans sagði aftur á móti að rík skylda hvíli á notendum greiðslukorta að gera nauðsynlegar varúðarráðstafanir við notkun þeirra. Taldi minnihlutinn að viðkomandi hafi ekki gætt nægjanlegrar aðgátar þegar hann sló inn PIN-númerið.
