Eins og alþjóð veit eflaust þá fannst hinn landsfrægi köttur Díegó í gær eftir að hafa verið numinn á brott úr Skeifunni þar sem honum finnst best að lifa lífinu. Leitin að Díegó vakti mikla athygli, meira að segja út fyrir landsteinana, og fögnuðurinn var nánast áþreifanlegur þegar hann fannst. Sumir, til að mynda Eva Hauksdótir lögmaður, furða sig hins vegar á málinu og þá sérstaklega á aðkomu Lögreglunnar á höfuðborgarsvæðinu að því en það var lögreglan sem fór og sótti Díegó í heimahús þar sem aðili bjó sem hafði fengið köttinn í snemmbúna jólagjöf, án þess þó að vita að um væri að ræða kött sem hefði verið tekinn ófrjálsri hendi.
Eva ritar um málið á Facebook:
„Líklega er Skeifukötturinn ástsælasti köttur landsins og eðlilegt að fólk hafi áhyggjur þegar hann hverfur. Ágætt líka að löggan sýni málinu áhuga. En eitthvað er samt undarlegt við það að löggan hafi tíma til að leita að ketti á meðan hún hefur ekki tíma til að rannsaka mál þar sem grunur er uppi um líkamsárásir, kynferðisbrot og jafnvel manndráp. Rannsóknir í slíkum málum taka stundum mörg ár og skýringin er alltaf sú sama; það er bara svo brjálað að gera hjá löggunni.“
Í athugasemdum taka flestir undir orð Evu og í tveimur þeirra er fullyrt að liðsmenn samtakanna Dýrfinnu, sem leita að týndum gæludýrum, hafi unnið alla rannsóknarvinnuna við leitina en lögreglan aðeins séð um að sækja Díegó þegar legið hafi fyrir hvar hann væri. Það stangast þó á við frásögn rannsóknarlögreglumanns sem sagði frá því í frétt RÚV að kollegi viðkomandi hefði kannað upptökur úr öryggismyndavél í verslun A4 í Skeifunni, þaðan sem Díegó var numinn á brott, borið kennsl á ræningjann og þegar haldið að heimili viðkomandi sem hafi endað með því að kötturinn frægi fannst á heimili þess sem hafði fengið Díegó í jólagjöf.
