Sólveig Anna Jónsdóttir formaður Eflingar segir á Facebook-síðu sinni að einn af meðlimum félagsins hafi óskað eftir liðsinni þess þar sem vinnuveitandi hans, Reykjavíkurborg, hafi haft af honum uppsafnað orlof. Borgin hafi ekki enn svarað Eflingu þótt erindi vegna máls viðkomandi hafi verið sent fyrir mánuði:

„Góður félagi sem er einn af ómissandi starfsmönnum Reykjavíkurborgar leitaði til mín og samstarfsfélaga míns, Ragnars Ólasonar, sem er sérfræðingur hjá Eflingu í kjarasamningum og kjarasamningsgerð, fyrir um mánuði síðan. Reykjavíkurborg hafði af honum haft ríflega 86 stundir af uppsöfnuðu orlofi. Ragnar sendi samstundis erindi til velferðasviðs og mannauðssviðs borgarinnar og krafðist þess að fyrningin yrði dregin til baka. Við erum enn að bíða eftir svari.“

Þolinmæðin á þrotum

Sólveig Anna segir þolinmæði Eflingar vera á þrotum og að á mánudaginn verði borginni send ítrekun:

„Á mánudaginn munum við ítreka kröfuna. Ef að ekki verður við henni brugðist með jákvæðum hætti leitum við annara leiða til að tryggja að maðurinn sem til okkar leitaði fái til baka það sem borgin hefur af honum haft með óréttmætum hætti. Við sættum okkur ekki við að af verkafólki Reykjavíkurborgar sé tekið þeirra uppsafnaða orlof á meðan meðlimir opinberu borgarastéttarinnar, hinir ýmsu stjórar, fái að safna á milli orlofsára eins mikið af tímum og þeim sýnist, til þess að fá þá svo greidda út sem milljónir þegar þeir láta af störfum.“

Þarna er Sólveig Anna að vísa til fréttar Vísis en þar kemur fram að 13 embættismenn Reykjavíkurborgar sem létu af störfum frá 2014 og til dagsins í dag fengu allir greitt eldra ótekið orlof við starfslok, allt að 824 orlofsstundir eða 103 daga, í einu tilfelli. Samtals var hjá þessum 13 um að ræða jafngildi 512 orlofsdaga uppsafnaðra á árunum áður en þessir embætissimenn hættu.

Þótt Sólveig Anna segi það ekki bókstaflega þá virðist hún vera að saka Reykjavíkurborg um að mismuna starfsfólki sínu eftir því hversu ofarlega það er í skipuritinu.