Vegna fréttar DV í gær um erfiða stöðu barnaverndarmála í Mosfellsbæ og mikla fjölgun tilkynninga til barnaverndar hefur Regína Ásvaldsdóttir bæjarstjóri komið því á framfæri við fréttamann að samþykkt hafi verið í bæjarstjórn í lok ágúst að tillögur um sérstakar aðgerðir í málaflokknum verði að liggja fyrir þegar fjárhagsáætlun næsta árs verður lögð fram. Regína segir að unnið sé markvisst að gerð sérstakrar áætlunar um aðgerðir í málaflokknum.

Mikill þungi barnaverndarmála í Mosfellsbæ

Eins og fram kom í frétt DV í gær var ítarlegt minnisblað um erfiða stöðu í barnaverndarmálum meðal gagna sem fylgdu fundargerð fundar bæjarstjórnar sem fram fór í vikunni. Minnisblaðið og það sem fram kom í því var ekki sérstaklega rætt á fundinum og í fundargerð var ekkert bókað um mögulegar aðgerðir.

Í fundargerð bæjarstjórnar frá fundi hennar 28. ágúst síðastliðinn var hins vegar bókað að bæj­ar­stjórn Mos­fells­bæj­ar lýs­ti yfir þung­um áhyggj­um af stöðu fjölg­un­ar barna­vernd­ar­mála og legg­i ríka áherslu á að far­ið verði í mark­viss­ar að­gerð­ir í þágu for­varna í sam­starfi þeirra að­ila sem koma að upp­eldi og vel­ferð barna. Til­lög­ur þess efn­is skuli liggja fyr­ir við fram­lagn­ingu fjár­hags­áætl­un­ar.

Í tölvuskeyti til fréttamanns segir Regína Ásvaldsdóttir bæjarstjóri að unnið sé að áætlun sem verði lögð fram í lok október og hjá bænum hafi verið haldnar vinnustofur með helstu sérfræðingum bæjarins í barnaverndarmálum, bæði á velferðarsviði og fræðslu- og frístundasviði. Þá hafi verið haldinn opinn fundur með foreldrum nemenda á unglingastigi grunnskólum í bænum og kallað eftir tillögum og í næstu viku verði fundur með foreldrum nemenda á miðstigi. Þá hafi málið einnig verið rætt við ungmennaráð og tillögur fengnar frá ráðinu.

„Við munum því setja fram heildstæða áætlun til að mæta þessari stöðu,“ segir Regína.