Finnur Oddsson, forstjóri Haga, segir að félagið sé í viðræðum við hluthafa sína vegna opnunar netverslunar með áfengi hjá Hagkaupum. Sumir þeirra hafi lýst áhyggjum sínum vegna hennar.
Eins og DV hefur fjallað um undanfarnar vikur þá hafa sumir lífeyrissjóðir, eigendur í Högum, viðrað áhyggjur sínar hvað varðar opnun netverslunar með áfengi. Meðal annars Brú sem á um 10 prósent og beinlínis harmaði opnunina í bréfi. Þá hafa smærri eigendur, Lífsverk og Almenni lífeyrissjóðurinn, innt forstjóra Haga um hvernig netverslunin samrýmist lýðheilsustefnu félagsins.
Eining má nefna að stærsti eigandinn, Gildi sem á 17 prósent, var ósátt við það kaupréttarkerfi sem komið var upp hjá 9 æðstu starfsmönnum Haga á sama tíma og áfengissala Hagkaupa.
„Sumir hluthafa í Högum hafa spurst fyrir um netverslun með áfengi á vegum Hagar Wines,” segir Finnur í skriflegu svari við fyrirspurn DV. „Fáeinir hafa einnig reifað áhyggjur vegna þessarar starfsemi, þá í tengslum við sjálfbærni og möguleg áhrif á lýðheilsu. Eðli máls samkvæmt tökum við mark á og tillit til fjölbreyttra skoðana hluthafa á okkar rekstri og eigum nú í samtali við nokkra þeirra um þessi mál.”
DV spurði einnig um hvernig áfengissalan færi fram. Það er hver ferill áfengisflöskunnar sé frá framleiðenda eða birgja til neytenda í gegnum Haga og hvernig Finnur telji að áfengissala uppfylli markmið um að lýðheilsa sé höfð í fyrirrúmi en svör við því bárust ekki.
