Bogi Nils Bogason, forstjóri Icelandair, segir að það sé hvorki raunsætt né skynsamlegt að forgangsraða innviðauppbyggingu núna með því að setja hundruð milljarða króna í nýjan flugvöll.

Bogi lýsir þessari skoðun sinni í samtali við Morgunblaðið í dag.

Skýrsla starfshóps um rannsóknir á byggingu flugvallar í Hvassahrauni var kynnt í vikunni og eru helstu niðurstöður þær að veðurskilyrði mæla ekki gegn byggingu flugvallar í Hvassahrauni, að flugvallarsvæði væri að mestu utan skilgreindra eldstöðvakerfa og að langtímaáhrif verði ekki mikil á innanlandsflug verði það fært á nýjan flugvöll. Meðal tillagna hópsins er að skilgreint svæði verði tekið frá upp af Hvassahrauni fyrir þrjár flugbrautir og að unnið verði að frekari rannsóknum.

Bogi bendir á í samtali við Morgunblaðið að við séum með fjóra alþjóðlega flugvelli og skynsamlegra sé að byggja þá upp heldur en nýjan flugvöll í Hvassahrauni sem mun kosta hundruð milljarða.

„Flug­stöðin í Reykja­vík er hvorki boðleg starfs­fólki né farþegum og meðan flug­völl­ur­inn er alltaf í patt­stöðu er erfitt að fram­kvæma og fjár­festa þar. Það er mik­il­vægt að leysa úr þess­ari stöðu og fara í þá upp­bygg­ingu sem er al­gjör­lega nauðsyn­leg,“ segir hann og bætir við að flugvöllurinn þjóni ágætlega hlutverki sínu í dag þó að innviðir séu ekki nógu sterkir.

„Það þarf bara að taka ákvörðun um að styrkja þá og horfa til þess að völl­ur­inn verði þarna áfram næstu ára­tug­ina.“

Bogi segir þar að auki að peningunum mætti verja til skynsamlegri hluta en uppbyggingu nýs flugvallar í Hvassahrauni.

„Við vit­um að það þarf að styrkja vega­kerfið veru­lega, heil­brigðis­kerfið, lög­gæsl­una og margt fleira og ég held að við ætt­um að horfa á þá þætti áður en við för­um að fjár­festa í nýj­um flug­velli þar sem við erum með fjóra fyr­ir og þarf ekki að kosta svo miklu til, til að styrkja þá enn frek­ar,“ seg­ir Bogi Nils við Morgunblaðið þar sem ítarlega er fjallað um málið.