Elliði Vignisson bæjarstjóri Ölfuss rifjar upp að í dag eru 51 ár frá því að gos hófst í Heimaey, en Elliði er fæddur og uppalinn í Vestmannaeyjum. Þegar gosið hófst 23. janúar 1973 var Elliði tæplega fjögurra ára, rúmir þrír mánuðir í afmæli hans.

„Í dag eru 51 ár frá því að eldgos hófst í Eyjum. Nú stendur ógnin á þeim sem áður veittu mér og mínum skjól,“ segir Elliði og birtir með mynd af sér sem tekin var gosnóttina fyrir 51 ári.

Fjölskylda Elliða fór til Grindavíkur eins og fleiri Eyjamenn. „Fáum klukkutímum síðar vorum við fjölskyldan komin til Grindavíkur þar sem við dvöldum stóran hluta af gostímanum í Eyjum.

Nú eru gos og önnur náttúruvá í Grindavík. Mig setti hljóðan þegar ég sá að eitt af fyrstu húsunum sem hraunið í Grindavík skall á var í eigu Unndórs Sigurðssonar, sonar Sigga löggu og Bínu, sem skutu yfir okkur skjólshúsi í Grindavík hluta af þeim tíma þegar jarðeldar ógnuðu okkar heimili í Eyjum,“ segir Elliði. Unndór var ekki fæddur þá, en hann er fæddur árið 1976.

Sjá einnig: Grindvíkingar sem misstu hús sín undir hraun ætla allir á endanum heim aftur – ,,Ég er allslaus í dag”

„Við vorum öll Eyjamenn árið 1973, nú erum við öll Grindvíkingar.“