Heldur virðist hafa dregið úr eldgosinu sem hófst rétt norðan við Grindavík í gærmorgun og gýs nú einungis á tveimur stöðum á sprungunni. Eldfjalla- og náttúruvárhópur Suðurlands á Facebook segir að mestur krafturinn sé í gospopi rétt sunnan Hagafells.
Þorvaldur bendir á að landris hafi haldið áfram í Svartsengi en á sama tíma hafi það sigið í Eldvörpum og í Skipastígshrauni.
Þorvaldur segir að vísindamenn séu að túlka þetta á tvennan hátt, annars vegar að Svartsengi sé staðsett þannig það lendir undir áhrifum af kvikuganginum.
„Það er ein túlkunin að sem er að gerast í Svartsengi sé afleiðing af innskotinu og breyti ekki neinu um kvikumagnið sem er í tengslum við þetta allt saman.“
Hin sviðsmyndin er sú að ef landris í Svartsengi sé vegna viðbótarkviku sem er að koma inn í kerfið þá geti það breytt miklu.
„Það getur breytt sviðsmyndinni dálítið mikið því þá ertu hugsanlega kominn með stöðugt flæði frá þessari dýpri kvikugeymslu upp á yfirborðið. Ef það nær einhverju jafnvægi gæti það haldið áfram vikum og jafnvel mánuðum saman. Þá er sviðsmyndin orðin allt önnur og miklu alvarlegri fyrir Grindavík.“
Það segi sig sjálft að eftir því sem gosið stendur lengur þeim mun meiri líkur séu á að hraun flæði lengra inn í bæinn og að mikilvægum innviðum. „En varnargarðurinn virkaði rosalega vel og hélt ansi mikið af hrauninu fyrir norðan þannig að þessi aðgerð virkaði bara mjög vel.“
Þorvaldur telur að fyrri möguleikinn sé líklegri, sem betur fer, eins og staðan er núna.
„Ef gosið heldur áfram að dvína þá er fyrri sviðsmyndin líklegri. Þá er þetta landris í Svartsengi eitthvað tengt bara kvikuganginum og myndun hans. En ef gosið fer að ná jafnvægi og halda ákveðnum dampi, þó hann sé ekki mjög hár, þá finnst mér það benda til að seinni sviðsmyndin sé líklegri. En mér finnst fyrri sviðsmyndin langlíklegust.“
Aðspurður hvort íbúar á Reykjanesskaganum þurfi að vera viðbúnir frekari eldsumbrotum næstu misserin segir Þorvaldur að þetta sé ekki búið.
„Því miður. Það er einu sinni þannig að þetta á enn töluvert eftir.“
