“Því miður, þá hafa björgunarsveitir snúið við göngufólki sem er að sækja úr allskonar leiðum. Þetta er um langan veg að fara, það er vetur á Íslandi. Þetta er hættulegt, það eru sprungur að opnast og hraun að flæða. Þetta er ekki hægt, þetta fólk verður bara að stoppa og staldra við ” segir Haraldur Haraldsson, formaður Björgunarsveitarinnar Suðurnes í viðtali við RÚV fyrir stundu.

Þar áréttar Haraldur að hætta sé á ferðum og svæðið við Grindavík sé ótryggt. Þá hafi björgunarsveitir ekki mannskap til þess að glíma við forvitið göngufólk þegar næg önnur verkefni eru til staðar.

Endurómar Haraldur þannig skilaboðum Víðis Reynissonar, sviðstjóra Almannavarna, frá því fyrr í morgun þar sem hann biðlaði til landsmanna að gefa viðbragðsaðilum vinnufrið til að sinna þeim grafalvarlegu atburðum sem nú eru í gangi við Grindavík.

Haraldur benti ennfremur á að allar leiðir að Grindavík væru lokaðar, ekkert hraunflæði sést frá Reykjanesbraut og Nesvegur og Grindavíkurvegur séu lokaðir. Sagði hann að áhugafólk um eldsumbrotin geti í kvöld reynt að keyra að Patterson-flugvelli sem væri í öruggari fjarlægð og þaðan gæti það séð gosbjarma þegar kvölda tekur.