Stofnuð hafa verið íbúasamtök gegn óþarfa flugumferð á Reykjavíkurflugvelli. Flug hefur aukist mikið og áhrif þess að búa við hávaðann eru slæm á heilsuna.
Hljóðmörk heita samtökin og eru það einkum íbúar í miðborg Reykjavíkur, Vesturbæ, Hlíðum, Skerjafirði og Kársnesi í Kópavogi sem standa að þeim. En einnig fólk annars staðar af á höfuðborgarsvæðinu, svo sem Fossvogi, Garðabæ og jafnvel Hafnarfirði.
Markmiðið er að óþarfa flug hverfi frá Reykjavíkurflugvelli. Þetta er til dæmis flug einkaþota og annarra flugvéla, útsýnisflug, kennsluflug og þyrluflug. Þetta á ekki við um sjúkraflug, björgunarflug eða reglubundið innanlandsflug.
„Í einkaþotum milljarðamæringa eru stundum aðeins tveir um borð,“ segir Kristján Vigfússon, íbúi í Hlíðunum og einn af stofnendum Hljóðmarka. „Við erum komin vel af stað og höfum fengið gríðarlega góð viðbrögð frá almenningi. Þetta eru ekki nokkrar manneskjur sem eru pirraðar yfir þyrluflugi. Þetta er stór hreyfing sem er að verða til á höfuðborgarsvæðinu. Fólk er búið að fá nóg.“
Samtökin byrjuðu fyrir ekki svo löngu síðan þegar þrír einstaklingar sem voru áhugasamir um starfsemina á flugvellinum heyrðu af og fundu hvora aðra. Vatt þetta svo upp á sig þegar þeir heyrðu af fleira fólki sem var óánægt með mikla aukningu flugs á vellinum á undanförnum árum.
Kristján bendir á að rannsóknir hafi sýnt slæm áhrif þess að búa í nálægð við hávaða flugvalla. Þetta hafi til dæmis áhrif á svefn fólks, hjartasjúkdóma og geðheilsu. Ekki síst börn, en í næsta nágrenni við flugvöllinn er leikskóli og vinsæl útivistarsvæði í Öskjuhlíð og Nauthólsvík.
Einnig vísar hann í tíu ára gamla skýrslu umhverfisstofnunar Evrópu þar sem umhverfismengun frá flugvelli hafi verið sú þriðja mesta í Reykjavík. Flug hafi aðeins aukist síðan þá.
Forsvarsfólk Hljóðmarka hefur ekki setið auðum höndum síðan samtökin voru stofnuð. Þegar hafa þau fengið góð viðbrögð hjá borgarstjórn og óskað eftir fundi með heilbrigðiseftirliti borgarinnar. Einnig hafa þau óskað eftir fundi með ISAVIA og fengið fund með Svandísi Svavarsdóttur innviðaráðherra.
Í áratugi hefur verið deilt um hvort Reykjavíkurflugvöllur eigi að vera áfram í Vatnsmýrinni eða vera fluttur annað. Kristján segir stofnun Hljóðmarka ekki snúast um það.
„Reykjavíkurflugvöllur er ekki að fara burt næstu áratugina. Það er ekki búið að finna nýtt flugvallarstæði,“ segir hann. „Ég held að við getum lifað í sátt og samlyndi við innanlandsflug, Landhelgisgæsluna og sjúkraflugið. Það er þetta óþarfa flug sem við erum að benda á.“
