Í Lögbirtingablaðinu í dag er birt fyrirkall og ákæra yfir manni á fertugsaldri. Er maðurinn kvaddur til að koma fyrir dóm þar sem hann sætir ákæru fyrir líkamsárás með því að hafa haustið 2022 ráðist á konu á þrítugsaldri við skemmtistaðinn Ránna í Reykjanesbæ.
Í fyrirkallinu segir að maðurinn sé með ótilgreint lögheimili í Reykjanesbæ. Samkvæmt ákærunni sló hann konuna í andlitið og átti árásin sér stað við Ránna en staðsetningu er ekki lýst nánar. Urðu afleiðingarnar þær að konan hlaut skurð á efri vör, höfuðverk, svima og fleiri einkenni sem bentu til heilahristings, verk yfir vinstri öxl og sár inn á vinstri nös.
Er þess krafist í ákærunni að maðurinn verði dæmdur til refsingar og greiðslu alls sakarkostnaðar.
Af hálfu konunnar er þess að krafsist að maðurinn verði dæmdur til að greiða henni 2 milljónir króna auk vaxta og dráttarvaxta. Þess er einnig krafist fyrir hönd konunnar að þóknun réttargæslumanns greiðist úr ríkissjóði en að öðrum kosti er gerð krafa um málskostnað úr hendi mannsins, konunni að skaðlausu.
Málið hefur þegar verið þingfest fyrir Héraðsdómi Reykjaness og verður tekið fyrir í október.
