Ríkssaksóknari hefur slegið á putta lögreglustjórans á höfuðborgarsvæðinu og gert afturreka þá ákvörðun hans að hætta rannsókn á meintum mútugreiðslum forsvarskvenna Solaris-samtakanna, Semu Erlu Serdaroglu og Maríu Lilju Ingveldar Þrastardóttur Kemp, til erlendra embætismanna til að liðka fyrir flótta palentínskra hælisleitenda frá Gaza-ströndinni hingað til lands.
Morgunblaðið greinir frá þessu.
Það var Einar S. Hálfdánarson, hæstaréttarlögmaður og faðir Diljá Mistar Einarsdóttur, þingkonu Sjálfstæðisflokksins og formanns utanríkismálanefndar Alþingis, sem lagði fram kæruna fyrr á þessu ári. Um var að ræða meðferð á fjármunum sem söfnuðust í fjáröflun undir merkjum Solaris-samtakanna og meðferð á þeim sem Einar taldi meðal annars stangast á við lög um aðgerðir gegn peningaþvætti og fjármögnun hryðjuverka.
Lögregla ákvað síðan að fella rannsókn málsins niður því ekki væri grundvöllur fyrir áframhaldandi rannsókn. Þeirri ákvörðun fagnaði meðal annars Helga Vala Helgadóttir, lögmaður tvímenninganna, sem sagði kæruna ekki studda neinum gögnum og eini tilgangurinn væri að hræða baráttufólk fyrir mannréttindum.
Í umfjöllun Morgunblaðsins kemur fram að ríkissaksóknari hafi óskað eftir rökstuðningi fyrir þessari ákvörðun lögreglustjóraembættisins en svar hafi ekki borist. Engin rök séu fyrir því í gögnum málsins að hætta hefði átt rannsókn og því farið fram á að lögreglustjóraembættið taki „málið til viðeigandi meðferðar.“
